হাত চাপৰি,শংখ,কাঁহ বজাই ধন্যবাদ জনালে কৰ’নাতংকৰ সময়ত জনতাৰ স্বাৰ্থত কৰ্ম কৰা লোকসকলক

গুৱাহাটী,২২ মাৰ্চঃ বিশ্বৰ লগতে সমগ্ৰ দেশত কৰ’না ভাইৰাছৰ ত্ৰাসৰ মাজতে আজি চিকিৎসক,সংবাদকৰ্মীসকলৰ লগতে জৰুৰীকালীন সেৱাৰ লগত জৰিত থকা লোকসকলক কৃতজ্ঞতাৰ হেতু হাত চাপৰি,কাঁহ বজাই ধন্যবাদেৰে ওপচাই পেলালে ৰাজ্যৰ জনগণে ৷ প্ৰধানমন্ত্ৰী নৰেন্দ্ৰ মোদীয়ে কৰ’না ভাইৰাছৰ প্ৰতিহত কৰাৰ কাৰণে দেওবাৰে দেশৰ জনগণক পুৱা সাত বজাৰ পৰা নিশা নবজালৈ “জনতা কাৰ্ফিউ” প্ৰযোজ্য কৰিছিল ৷ লগতে বিয়লি পাঁচ বজাত কৰ’না ভাইৰাছৰ দৰে মহামাৰীৰ সময়তো জনগণৰ স্বাৰ্থত নিজৰ দায়িত্ব পালন কৰা প্ৰত্যেকজন লোকক হাত চাপৰিৰে ধন্যবাদ দিবলৈ জনগণক আহ্বান কৰিছিল প্ৰধানমন্ত্ৰী মোদীয়ে ৷ সেয়েহে দেশৰ প্ৰধানমন্ত্ৰীৰ প্ৰতিটো বাক্য আজি আখৰে আখৰে পালন কৰিলে দেশৰ জনগণে ৷ ইতিমধ্যে কৰ’না ভাইৰাছে সমগ্ৰ বিশ্বৰ প্ৰযুক্তি বিদ্যাৰৰে উন্নত প্ৰায় কেইখন দেশক ধৰাসায়ী কৰিছে ৷ লগতে ভাৰততো কৰ’নাত আক্ৰান্ত লোকৰ সংখ্যা ক্ৰমাৎ বৃদ্ধি পাইছে ৷ভাৰতত কৰ’নাত সাত জন লোকে মৃত্যু বৰণ কৰিছে ৷ইয়াৰ লগে লগে সম্প্ৰতি অসমতো জনগণৰ মাজত কৰ’না ভাইৰাছৰ আতংকই বিৰাজ কৰিছে ৷ শনিবাৰে যোৰহাটৰ পুলিবৰৰ এটি শিশুৰ শৰীৰত কৰ’না ভাইৰাছৰ স্থিতি আছে বুলি প্ৰকাশ পোৱা বাতৰিয়ে কেৱল সেই অঞ্চলটোতে নহয় সমগ্ৰ অসম আতংকিত হৈ পৰিছিল ৷ অৱশ্যে দ্বিতীয় বাৰৰ কাৰণে পৰীক্ষা কৰোতে শিশুটি যে কৰ’না ভাইৰাছ আক্ৰান্ত নহয় সেই তথ্য স্বাস্থ্যমন্ত্ৰী ড° হিমন্ত বিশ্ব শৰ্মাই প্ৰকাশ কৰে ৷ গতিকে এই সময়তে জনপ্ৰতিনিধি সকলৰ লগতে দেশৰ প্ৰধানমন্ত্ৰী মোদীয়েও সকলো জনগণক নিজৰ বাসগৃহৰ ভিতৰতে থাকি সুস্থ আৰু সজাগ হ’বলৈ আহ্বান জনাইছে ৷