সমগ্ৰ বিশ্বৰ লগতে ভাৰততো কৰ’না ভাইৰাছৰ সংক্ৰমণে আতংক সৃষ্টি কৰিছে ৷ এই ভাইৰাছে সম্প্ৰতি অসমতো সংহাৰী ৰূপ ধাৰণ কৰিছে ৷ কিন্তু এই ভাইৰাচৰ সংক্ৰমণৰ লগে লগে একাংশ লোকে কিছুমান অসত্য,অৰ্ধসত্য তথা প্ৰমাণহীন তথ্যপাতি প্ৰচাৰ কৰি মানুহক বিভ্ৰান্ত কৰাটো প্ৰত্যক্ষ হৈছে ৷এনে কেতবোৰ কৰ’না কেন্দ্ৰিক গুজব বা ভ্ৰান্ত ধাৰণা আৰু ইয়াৰ প্ৰকৃত সত্যতা সন্দৰ্ভত তলত উল্লেখ কৰা হ’ল ৷
ছ’চিয়েল মিডিয়াত কৰ’নাৰ সন্দৰ্ভত এটা বাতৰি যথেষ্ট প্ৰচাৰিত হৈছে যে অতিৰিক্ত শীতল পৰিৱেশত ন’ভেল কৰ’না ভাইৰাছৰ সংক্ৰমণ ৰোধ কৰিব পাৰি ৷ কিন্তু বিশ্ব স্বাস্থ্য সংস্থাই প্ৰকাশ কৰা মতে এই তথ্য মুঠেই সত্য নহয়। শীতল পৰিৱেশে যিকোনো ভাইৰাছ বা ভাইৰাছজনিত ৰোগ প্ৰতিৰোধ কৰিবলৈ সক্ষম নহয় বুলিহে বিশ্ব স্বাস্থ্য সংস্থাই তথ্য প্ৰকাশ কৰিছে ৷
বিভিন্ন সামাজিক সংবাদ মাধ্যমত কৰ’নাৰ সন্দৰ্ভত প্ৰকাশ পোৱা আন এটা তথ্য হৈছে ভিটামিন চিৰ ছাপ্লিমেন্ট গ্ৰহণ কৰিলে এই মাৰাত্মক ভাইৰাছৰ সংক্ৰমণ প্ৰতিৰোধ কৰা সম্ভৱ ৷ কিন্তু মেডিচিন বিশেষজ্ঞ ডা° অৰিন্দম বিশ্বাসে প্ৰকাশ কৰা মতে ভিটামিন চি ছাপ্লিমেন্টে কৰ’না ভাইৰাছৰ সংক্ৰমণ প্ৰতিৰোধ কৰিব কম পাৰে ৷ ইয়াৰ কোনো প্ৰমাণ এতিয়ালৈকে পোৱা নাই। মেডিকেল স্কুল অৱ হাৰ্ভাৰ্ড ইউনিভাৰ্চিটিৰ গৱেষকেও একে মত প্ৰকাশ কৰিছে ৷
ছ’চিয়েল মিডিয়াত প্ৰচাৰিত আন এটি তথ্য হৈছে মহে কামোৰাৰ জৰিয়তে কৰ’না ভাইৰাছৰ সংক্ৰমণ হ’ব পাৰে। কিন্তু এই ক্ষেত্ৰত পিটছবাৰ্গ ইউনিভাৰ্চিটিৰ গৱেষকসকলে কয় যে এই তথ্য সম্পূৰ্ণ অসত্য । কাঁহ আৰু হাঁচিৰ ড্ৰপলেটৰ জৰিয়তেহে কৰ’না ভাইৰাছ সংক্ৰমিত হয় ।
শেহতীয়াভাৱে ছ’চিয়েল মিডিয়াত প্ৰচাৰিত হোৱা আন এটি বাতৰি হৈছে শিশুসকল কৰ’না ভাইৰাছত আক্ৰান্ত হোৱাৰ সম্ভাৱনা তেনেই সীমিত ৷ কিন্তু বিশ্ব স্বাস্থ্য সংস্থাৰ তথ্য অনুসৰি এই দাবী সম্পূৰ্ণৰূপে ভুল ৷ যিকোনো বয়সৰ লোক এই ভাইৰাচৰ সংস্পৰ্শলৈ আহিলে কৰ’নাত আক্ৰান্ত হোৱাৰ সম্পূৰ্ণ সম্ভাৱনা আছে। উল্লেখযোগ্য যে শেহতীয়া আমেৰিকাত এটি শিশুৱে কৰ’না ভাইৰাছত আক্ৰান্ত হৈ প্ৰাণ হেৰুৱায় ৷ একেদৰে পশ্চিমবংগতো এটি নমহীয়া শিশু এই ভাইৰাছত আক্ৰান্ত হৈছে।
