কাজিৰঙাৰ গড় নিধনৰ বাবে অহা চোৰাং  চিকাৰীক বন্ধুকসহ আটক  

সমগ্ৰ দেশত অব্যাহত থকা লকডাউনৰ অচিলা লৈ অসম গৌৰব এশিঙীয়া গড় নিৰ্ধনৰ বাবে অহা এটা চোৰাং চিকাৰীক সোমবাৰে আৰক্ষীয়ে আটক কৰিবলৈ সক্ষম হয় | কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ পৰা এটা গড় জনাঞ্চললৈ ওলাই ব্ৰহ্মপুত্ৰৰ বামুন চাপৰি, লহৰ চাপৰি লগতে বিভিন্ন অঞ্চলত বিচৰণ কৰি থকাৰ খবৰ  লাভ কৰিছিল কমাৰগাঁও আৰক্ষীয়ে। ইফালে গড়টো হত্যা বাবে  উক্ত চাপৰিত চোৰাং চিকাৰী আত্মগোপন কৰি থকা তথ্য লাভ কৰি  আৰক্ষী বিষয়া ময়ুৰজিত গগৈ আৰু  ভাৰপ্ৰাপ্ত সহকাৰী উপ পৰিদৰ্শক জীয়াউল ইছ্লামৰ নেতৃত্বত আৰক্ষীৰ দলটোৱে ব্ৰহ্মপুত্ৰৰ অতি দুৰ্গম অঞ্চলৰ লহৰ চাপৰিত অভিযান চলাই | এক কৌশলপূৰ্ণ অভিযানৰ শেষত আৰক্ষীয়ে অৰুনাচল প্ৰদেশৰ গাগম ইকো(২৮) নামৰ এটা দুধৰ্ষ গড় চিকাৰীক এটা ৰাইফল গুলিসহ  আটক কৰিবলৈ সক্ষম হয় ।