কেন্দ্ৰীয় চৰকাৰৰ নিৰ্দেশনা অনুসৰি তলাবন্ধৰ মাজতো কেতবোৰ ক্ষেত্ৰত অসম চৰকাৰে শিথিলতা অনাৰ সিদ্ধান্ত গ্ৰহণ কৰিছে । এই বিষয়ে এক সংবাদমেলত সদৰী কৰে মুখ্য সচিব কুমাৰ সঞ্জয় কৃষ্ণই ৷ আনহাতে একেখন সংবাদমেলত আৰক্ষী সঞ্চালকপ্ৰধান ভাস্কৰজ্যোতি মহন্তই ৰাইজক সকীয়াই দিয়ে যে অহা মে’লৈ চলিবলগীয়া তলাবন্ধ সফল কৰিবলৈ আৰক্ষী বদ্ধপৰিকৰ ৷ সেয়েহে অতি প্ৰয়োজনীয় কাৰণক বাদ দি যিসকল লোকে তলাবন্ধ উলংঘা কৰিব তেওঁলোকৰ বিৰুদ্ধে আৰক্ষী কঠোৰ হ’ব। সেয়েহে ৰাইজক তেনে চেষ্টা নকৰিবলৈ মহন্তই সতৰ্ক কৰি দিয়ে ৷ শিথিলকৰণৰ সন্দৰ্ভত মুখ্য সচিব সঞ্জয় কৃষ্ণই সদৰি কৰা অনুসৰি আজিৰ পৰা ৰাজ্যৰ সকলো চৰকাৰী কাৰ্যালয় খোলা হ’ব ৷ কাৰ্যালয়ত শীৰ্ষ পৰ্যায়ৰ বিষয়াসকলৰ উপস্থিতি বাধ্যতামূলক ৷ কেৱল তৃতীয় আৰু চতুৰ্থ বৰ্গৰ কৰ্মচাৰীসকলৰ ক্ষেত্ৰতহে ৩০ শতাংশ উপস্থিতি নিশ্চিত কৰিব লাগিব । কাৰ্যালয়ত সকলোৱে মাস্ক পিন্ধাটো বাধ্যতামূলক হোৱাৰ উপৰি সামাজিক দূৰত্বকে ধৰি অন্যান্য সতৰ্কতামূলক ব্যৱস্থাসমূহ গ্ৰহণ কৰিব লাগিব ।
অৱশ্যে বেচৰকাৰী প্ৰতিষ্ঠান আৰু শিক্ষানুষ্ঠানসমূহ বতৰ্মানৰ দৰে বন্ধ থাকিব ৷ মুখ্য সচিবে উল্লেখ কৰে যে কাৰ্যালয় খুলিলেও কোনো কৰ্মচাৰীয়ে ব্যক্তিগত বাহন ব্যৱহাৰ কৰিব নোৱাৰিব ৷ তেওঁলোকৰ বাবে চৰকাৰে ৰাজ্যিক পৰিবহন নিগমৰ বাছৰ ব্যৱস্থা কৰিব ৷ তেনে বাছতো সামাজিক দূৰত্ব ৰক্ষা কৰিহে কৰ্মচাৰীয়ে অহা যোৱা কৰিব লাগিব। এই প্ৰসংগত মুখ্য সচিবজনে উল্লেখ কৰে তলাবন্ধৰ ফলত যিসকল কৰ্মচাৰী কাৰ্যালয়ৰ পৰা দূৰত থকা ঘৰত আৱদ্ধ হৈ আছে তেওঁলোক তিনি মে’লৈ তাতেই থাকিব পাৰিব ৷ শিথিল কৰা আন ব্যৱস্থাসমূহৰ বিষয়ে উল্লেখ কৰি মুখ্য সচিবজনে কয় “কাইলৈৰ পৰা গ্ৰাম্য অৰ্থনীতিৰ লগত জৰিত কাম কাজসমূহ চলিব পাৰিব ৷ সেই অনুসৰি কৃষিক্ষেত্ৰৰ লগত সকলো কাম কাজ চলিব। গ্ৰাম্য উদ্যোগবোৰো চলিব ৷ অৱশ্যে সকলোতে সতৰ্কতামূলক ব্যৱস্থাসমূহ পালন কৰাটো বাধ্যতামূলক ।”
প্ৰসংগক্ৰমে তেওঁ উল্লেখ কৰে যে অসমত ২৩০ টা খাদ্য সংসাধন উদ্যোগ আছে । বহু ইটাভাটা আছে ৷ সেইবোৰৰ কামো কাইলৈৰ পৰা আৰম্ভ কৰিব পাৰিব ৷ অনুৰূপ ধৰণে জলসিঞ্চন,জলসম্প আদি বিভাগৰ কাম চলিব ৷ হিমঘৰবোৰো কামো কাইলৈৰ পৰা মুকলি কৰিব পাৰিব। আনহাতে দিন নিৰ্ধাৰণ নহ’লেও ৰাজ্যত আৱদ্ধ হৈ থকা শ্ৰমিকসকলক নিজৰ ৰাজ্যলৈ প্ৰেৰণ কৰিব বুলি প্ৰকাশ কৰে মুখ্য সচিবে ৷ তলাবন্ধৰ সময়ত দুচকীয়া বাহন আৰু চাৰিচকীয়াত দুজন লোকহে যাত্ৰা কৰিব পাৰিব। এই সময়ত জৰুৰী চিকিৎসা আৰু সেই ধৰণৰ জৰুৰী কাৰণতহে সাধাৰণ লোকৰ চলাচল শিথিল কৰা হৈছে ৷ ইফালে পাঠ্যপুথিৰ নিৰ্দিষ্ট সংখ্যক দোকান সপ্তাহৰ তিনিদিন তিনিঘণ্টাকৈ খুলিব পাৰিব বুলি মুখ্য সচিবজনে জনায়। এই ক্ষেত্ৰত উপায়ুক্তসকলে অনুমতি প্ৰদান কৰিব । শিথিলকৰণৰ সুযোগ যাতে অন্য লোকে গ্ৰহণ কৰিব নোৱাৰে তাৰ প্ৰতি কঠোৰ ব্যৱস্থা গ্ৰহণ কৰা হ’ব বুলি জনায় সঞ্চালক প্ৰধান মহন্তই ৷ গতিকে অপ্ৰিয় কিবা ঘটনা সংঘটিত হোৱাতকৈ ৰাইজে তলাবন্ধ মানি চলিবলৈ ৰাইজক আহ্বান কৰে মহন্তই ।
চৰকাৰৰ নিৰ্দেশ অনুসৰি জৰুৰীকালীন সেৱাৰ কাৰণে ওলাই গ’লে মাস্ক পৰিধান কৰাটো বাধ্যতামূলক ৷ পাঁচজনকৈ অধিক লোক সমবেত হ’ব নোৱাৰিব ৷ ৰাজহুৱা স্থাপত থু পেলাব নোৱাৰিব ৷ গুটখা, সুৰা, চিগাৰেট বিক্ৰীত নিষেধাজ্ঞা ৷ জৰুৰীকালীন সেৱাৰ কাৰণে ওলাই অহা লোকে পৰিচয় পত্ৰ লৈ আহিব লাগিব ৷ পৰিচয় পত্ৰ নাথাকিলে কৰ্তৃত্বশীল পক্ষৰ পত্ৰ থাকিব লাগিব ৷ একে সময়তে স্বাস্থ্যবিভাগৰ মানুহ অহা যোৱা কৰাত যদি আৰক্ষীয়ে বাধা দিয়ে তেন্তে সংশ্লিষ্ট আৰক্ষীজন দায়ী হ’ব । মুঠৰ ওপৰত তলাবন্ধ শিথিল নহয় ৷