খুলিল চৰকাৰী কাৰ্য্যালয় : জনতা ভৱনৰ কৰ্মচাৰীৰ ক্ষেত্ৰত বেমেজালি

দেশজুৰা দ্বিতীয় পৰ্য্যায়ৰ তলাবন্ধৰ মাজতে আজিৰ পৰা অসমকে ধৰি দেশৰ বিভিন্ন ৰাজ্যত চৰকাৰী কাম-কাজকে ধৰি কেতবোৰ ক্ষেত্ৰত শিথিলতা অৱলম্বন কৰা হয়। সেই অনুসৰি অসমতো সংশ্লিষ্ট ক্ষেত্ৰবোৰৰ লগতে চৰকাৰী কাৰ্য্যালয় বোৰ খোলা হয়, কিন্তু চৰকাৰৰ সুপৰিকল্পিত ব্যৱস্থাৰ অভাৱ আৰু একাংশ অবিবেচক কৰ্মচাৰীৰ অতপালিত প্ৰথম দিনাই সমগ্ৰ ব্যৱস্থাটোত বেমেজালিৰ সৃষ্টি হয়।

ক’ৰণা ভাইৰাছৰ সংক্ৰমণ প্ৰতিৰোধৰ উদ্দেশ্যে বাধ্যতামূলক হোৱা সামাজিক দূৰত্ব ৰক্ষাও আনকি জনতা ভৱনৰ কৰ্মচাৰীৰ ক্ষেত্ৰতে ধোঁৱাচাঙত উঠে। উল্লেখ্য যে তৃতীয় আৰু চতুৰ্থ বৰ্গৰ ৩৩% কৰ্মচাৰীৰে কালিৰে পৰা কাম কাজ কৰিবলৈ নিৰ্দেশ জাৰি কৰিছিল। ইয়াৰ পৰিপ্ৰেক্ষিতত ৰাজ্য প্ৰশাসনৰ মূল কেন্দ্ৰস্থল জনতা ভৱনতো বিভাগবোৰৰ মুৰব্বীসকলে ৰ’ষ্টাৰ পদ্ধতিত কৰ্মচাৰীৰ উপস্থিতিৰ তালিকা প্ৰস্তুত কৰিছে।

অৱশ্যে তলাবন্ধৰ ফলত যিসকল কৰ্মচাৰী গুৱাহাটীৰ পৰা দূৰৰ অন্য জিলাত আবদ্ধ হৈ আছে তেঁওলোকক সদ্যহতে উপস্থিতিৰ তালিকাৰ পৰা আতঁৰত ৰখা হৈছে। গতিকে জনতা ভৱনৰ পৰা ঢুকি পোৱা স্থানৰ কর্মচাৰী সকলক লৈ যুগুত কৰা তালিকাৰ ভিত্তিত তেঁওলোকক অনাৰ বাবে অসম ৰাজ্যিক পৰিবহণ নিগমৰ বাছৰ ব্যৱস্থা কৰা হৈছে।

ইয়াৰ বাবে ১৬ খন বাছৰ ব্যৱস্থা কৰি বৃহত্তৰ গুৱাহাটী মহানগৰীৰ আঠটা স্থানৰ পৰা চলোৱা হয় । কিন্তু আজাৰকে ধৰি একাধিক পইণ্টৰ পৰা চলা বাছত সামাজিক দূৰত্ব ধোঁৱাচাঙত উঠে। বৰঞ্চ থিয় হৈও কৰ্মচাৰী আহিবলগীয়া হয়। অসম সচিবালয় সেৱা সন্থাৰ সাধাৰণ সম্পাদক পাৰ্থ হাজৰিকাই ইয়াকে লৈ উদ্বিগ্নতা প্ৰকাশ কৰে।

কিন্তু জিলা পৰ্য্যায়ৰ সৰহ সংখ্যক কাৰ্যালয়ত চৰকাৰী নিৰ্দেশ পালন কৰাটো জটিল হয়। এই সন্দৰ্ভত সদৌ অসম কৰ্মচাৰী পৰিষদৰ উপদেষ্টা বাসৱ কলিতাই কয় যে জিলা পৰ্য্যায়ৰ কাৰ্যালয়ত চৰকাৰী বাহনেৰে কৰ্মচাৰীক অনাৰ ব্যৱস্থা নাই। যদিও তেনে কাৰ্য্যালয় বোৰৰ বেছিভাগ স্থানীয় হয় তথাপিও তেওঁলোকৰ ঘৰ কাৰ্য্যালয়ৰ একেবাৰে কাষত নহয়। বেছিভাগ কৰ্মচাৰীৰে ঘৰ নূন্যতম ছয়-সাত কিলোমিটাৰ নিলগত। গতিকে চৰকাৰে যিহেতু ব্যক্তিগত বাহনেৰে কাৰ্যালয়লৈ অহাটো নিষিদ্ধ কৰিছে তেনেক্ষেত্ৰত বেছিভাগ কৰ্মচাৰী কাৰ্যালয়লৈ আহিব নোৱাৰিলে।

 প্ৰসংগ ক্ৰমে উল্লেখ্য যে চৰকাৰী ব্যৱস্থাৰ মাজতে জনতা ভৱনৰ একাংশ কৰ্মচাৰীয়ে অবিবেচকভাবে ব্যক্তিগত বাহনেৰে কৰ্মস্থলীলৈ অহাৰ অভিযোগ উক্ষাপিত হৈছে। যাৰ বাবে বাটত তেওঁলোক আৰক্ষী-নিৰপত্তাৰক্ষীৰ বাধাৰ সন্মুখীন হয়। এনে ঘটনা ৰাজ্যৰ কে’বাস্থানতো সংঘটিত হয়।