কৰ’না ভাইৰাছৰ দ্বাৰা আক্ৰান্ত হৈ যোৱা সাত মে’ত শেষ নিশ্বাস ত্যাগ কৰা দিপীকা নাথৰ শৰীৰত কৰ’নাৰ কোনো লক্ষণ ফুটি উঠা নাছিল । এই দাবী কৰিছে ই এছ আই চি হাস্পতাল কৰ্তৃপক্ষই ৷ কৰ’নাৰ সকলো লক্ষণ ফুটি উঠাৰ পাছতো প্ৰয়োজনীয় নমুনা সংগ্ৰহ নকৰাটো চিকিৎসকৰ ভুল বুলি ৰাজ্যৰ স্বাস্থ্যমন্ত্ৰী ড° হিমন্ত বিশ্ব শৰ্মাই কৰা মন্তব্যৰ প্ৰতিক্ৰিয়া প্ৰকাশ কৰি ই এছ আই চি হাস্পতালৰ জ্যেষ্ঠ চিকিৎসক ডা° অপূৰ্ব কুমাৰ শইকীয়াই কয় “কৰ’না ভাইৰাছৰ দ্বাৰা আক্ৰান্ত হোৱাৰ কোনো লক্ষণ ফুটি উঠা নাছিল দীপিকা নাথৰ শৰীৰত ৷ সেইবাবেই ই এছ আই চি হাস্পতালত চিকিৎসা গ্ৰহণৰ বাবে অহাৰ সময়ত কিশোৰীগৰাকীৰ নমুনা সংগ্ৰহ কৰা হোৱা নাছিল । চিকিৎসালয়লৈ অহাৰ সময়ত কিশোৰীগৰাকীয়ে ভৰি আৰু কঁকালৰ বিষ অনুভৱ কৰিছিল । সেই সময়ত জ্বৰ চৰ্দিকে ধৰি কোনো লক্ষণ নাছিল ৷”
হাস্পতালৰ অস্থিৰোগ বিভাগত কিশোৰীগৰাকী স্বাস্থ্য পৰীক্ষা সম্পন্ন কৰা হৈছিল যদিও হাস্পতালৰ পঞ্জীয়ন বহীত দীপিকা ৱাচফ’ৰ বুলিহে লিখা আছে ৷ লগতে মূল বাসিন্দা বিহাৰৰ বুলিও ই এছ আই চিৰ কাৰ্ডত উল্লেখ আছে । যোৱা ২৭ এপ্ৰিলত ই এছ আই চি হাস্পতাললৈ অহা বুলি কোৱা হৈছিল যদিও দৰাচলতে যোৱা ২মে’ত কালাপাহাৰস্থিত ই এছ আই চি হাস্পতাললৈ নিয়ে পৰিয়ালৰ লোকে । ইয়াৰ ভিত্তিত চিকিৎসালয়খনৰ চিকিৎসক ডা° মলয় হাজৰিকাই কিশোৰীগৰাকীক প্ৰয়োজনীয় ঔষধ দিয়ে। আৰু চিকিৎসকে উন্নত চিকিৎসাৰ কাৰণে দীপিকাক মহানগৰীৰ জয়ানগৰস্থিত ই এছ আই চি হাস্পতাললৈ নিবলৈ পৰামৰ্শ দিয়ে যদিও পৰিয়ালৰ লোকে চিকিৎসালয়লৈ যোৱাৰ পৰা বিৰত থাকে ৷
সম্প্ৰতি এই বিষয়টো সন্দৰ্ভত ৰাজ্য চৰকাৰৰ মুখ্য সচিবৰ ওচৰত এখন প্ৰতিবেদন দাখিল কৰিছে ডা° অপূৰ্ব কুমাৰ শইকীয়াই । তথ্যগত খেলিমেলিৰ বাবে ভুল বুজা বুজি হোৱাৰ কথাও প্ৰতিবেদনত উল্লেখ কৰা হৈছে । লগতে কিশোৰগৰাকীৰ স্বাস্থ্য পৰীক্ষা সম্পন্ন কৰা চিকিৎসক ডা° পলাশ বৰাৰ কৰ’নাৰ ফলাফল নিগেটিভ অহা বুলিও তেওঁ উল্লেখ কৰে।