কৰ’না সংক্ৰমণৰ প্ৰতিৰোধ বাবে অব্যাহত থকা তলাবন্ধই একপ্ৰকাৰ জুৰুলা কৰিছে সৰ্বসাধাৰণ লোকৰ জীৱন যাপন । বিশেষকৈ গ্ৰামাঞ্চলৰ লোক সকলে ৰোগী কঢ়িওৱাক লৈ অসুবিধাৰ সন্মুখীন হৈছে । তলাবন্ধই যেন সকলো ফালৰ পৰা স্তব্ধ কৰিছে সৰ্বসাধাৰণ লোকৰ দৈনন্দিন জীৱন-যাপন ।
তেনে এক ঘটনা সংঘটিত হৈছে বৰপেটা জিলাৰ কাছুমাৰা আৰক্ষী থানাৰ অন্তৰ্গত খোলাবন্ধ গাওঁত । গাঁওখনৰ ৰুমা বেগম নামৰ এগৰাকী গৰ্ভৱতী মহিলাক চিকিৎসকৰ পৰামৰ্শ মতে সন্তান প্ৰসৱৰ কাৰণে গোৱালপাৰা অসামৰিক চিকিৎসালয়লৈ নিয়া হয় যদিও পৰ্যাপ্ত চিকিৎসা প্ৰদান নকৰাত লাইফ কেয়াৰ নাৰ্ছিং হোমত ভৰ্তি কৰোৱা হয় বুলি পৰিয়ালৰ লোকে জনায় ।
ইপিনে, নাৰ্ছিং হোমতে মহিলাগৰাকীয়ে সন্তান জন্ম দিয়াৰ পিছত চিকিৎসকে ঘৰলৈ যাবলৈ দিয়াত এখন ব্যক্তিগত বাহনেৰে নগৰবেৰালৈ আনে । নগৰবেৰাৰ পৰা প্ৰায় ১০/১২ কিলোমিটাৰ দূৰৈৰ খোলাবন্ধা গাঁৱলৈ নৱজাতকসহ প্ৰসূতি গৰাকীক নিবলৈ এম্বুলেন্স নাপাই উপায়ন্তৰ হৈ চাঙীৰে নিবলৈ বাধ্য হয়।
প্ৰাপ্ত তথ্য মতে, আলোপতি ক্ষুদ্ৰ প্ৰাথমিক চিকিৎসালয়ত এখন এম্বুলেন্স আছে যদিও চালক নথকাৰ বাবে বন্ধ হৈ আছে। এনে পৰিস্থিতিত অতি বিপদজনক আৰু নিৰাপত্তাহীনতাৰ মাজেৰে নৱজাতকসহ প্ৰসূতি মহিলাগৰাকীক ঘৰলৈ নিয়ে পৰিয়ালৰ লোকে। ইপিনে, জিলাখনৰ আলোপতি শান্তিপুৰ গাওঁতো সংঘটিত হৈছে অনুৰূপ ঘটনা।
গাওঁখনৰ ওৱাজেদ আলী নামৰ লোকজনক চিকিৎসাৰ বাবে আলোপতি ক্ষুদ্ৰ প্ৰাথমিক স্বাস্থ্যকেন্দ্ৰলৈ নিয়ে যদিও চিকিৎসকে উন্নত চিকিৎসাৰ বাবে গোৱালপাৰালৈ প্ৰেৰণ কৰাত বিপাঙত পৰে পৰিয়ালৰ লোক। কিয়নো চালক নথকাৰ বাবে এম্বুলেন্স সেৱা নাপাই চাঙীৰে নগৰবেৰালৈ আনিবলৈ বাধ্য হয় ৰোগীজনক। এনে ঘটনাত ক্ষোভ ব্যক্ত কৰে পৰিয়ালৰ লোকে। লগতে ৰোগীৰ জীৱনক লৈ এনেদৰে হেতালি খেলা বন্ধ কৰিবলৈ স্বাস্থ্য বিভাগক দাবী জনায় ।
