বৰষুণ আৰু ঘূর্ণীধুমুহা নিসৰ্গৰ আগমনত যি পৰিৱেশৰ সৃষ্টি হৈছে, সেয়া কাকতি ফৰিঙৰ বংশবিস্তাৰৰ বাবে আদৰ্শ । সেইবাবেই কিছুদিনৰ বাবে স্তব্ধ হ’ব পাৰে এই বিশাল পতংগজাকৰ ধ্বংসলীলা । কেন্দ্ৰীয় চৰকাৰৰ ল’কাষ্ট ৱাৰ্ণিং সংস্থাৰ তৰফৰ পৰা এই কথা জনোৱা হৈছে । সংস্থাটোৰ উপ-সঞ্চালক কে এল গুৰ্জাৰে কয়, ‘ৰাজস্থানত যদি ভাল বৰষুণ হ’লহেঁতেন, তেন্তে সিবিলাক মৰু অঞ্চলতে থাকি গ’লহেঁতেন । তাৰ পৰা আঁতৰি নাহিলহেঁতেন । সেই পৰিৱেশত ১৫ ৰ পৰা ৩০ দিনৰ ভিতৰত তাতে প্ৰজনন কৰিলেহেঁতেন।’
উল্লেখ্য যে বিগত কিছু সপ্তাহৰ ভিতৰত কাকতি ফৰিঙৰ জাকে একাধিক অঞ্চলত আক্ৰমণ কৰিছে । ধ্বংস কৰিছে পঞ্জাৱ, মধ্যপ্ৰদেশ, মহাৰাষ্ট্ৰ, গুজৰাট, উত্তৰপ্ৰদেশ আৰু চত্তিছগড়ৰ বিভিন্ন অঞ্চলৰ কৃষিভূমিৰ ফচল । বাচি যোৱা নাই অসংখ্য গছৰ পাত । কাকতি ফৰিঙৰ আক্ৰমণৰ সন্দৰ্ভত ইতিমধ্যে কেন্দ্ৰই একাধিক ৰাজ্যক সতৰ্ক কৰিছে । এই প্ৰসংগত গুৰ্জাৰে কয়, ‘কাকতি ফৰিঙৰ বিশাল দলটো সম্প্ৰতি মধ্যপ্ৰদেশৰ শিৱপুৰী অঞ্চলত আছে । ৰাজস্থানৰ অশোকনগৰ, বিকানেৰ আৰু নাগৌড়, মহাৰাষ্ট্ৰৰ নাগপুৰ আৰু উত্তৰপ্ৰদেশৰ ঝান্সিৰ দিশে সিহঁত ক্ৰমাৎ আগুৱাই আছে ।
সংস্থাৰ উপ-সঞ্চালকজনে লগতে কয় যে যোৱা দেওবাৰে কাকতি ফৰিঙৰ বৃহৎ জাক এটাই ৰাজস্থানৰ জয়ছালমীৰত প্ৰৱেশ কৰিছিল । অৱশ্যে সেইবোৰক নিয়ন্ত্ৰণ কৰা হৈছে । কাকতি ফৰিঙে এই বছৰ ভাৰতৰ কৃষিত মাৰাত্মক ক্ষতিসাধন কৰিছে । এই ৰাক্ষসৰ দৰে আহাৰ খোৱা পতংগৰ বিয়াগোম জাকটোত নিৰীক্ষণ অব্যাহত ৰখাৰ লগতে সিহঁতৰ গতিবিধি পৰ্যবেক্ষণ আৰু প্ৰয়োজনত ড্ৰ’ণৰ সাহায্য ল’বলৈকো ৰাষ্ট্ৰসংঘৰ তৰফৰ পৰা পৰামৰ্শ দিছে । কাকতি ফৰিঙৰ আক্ৰমণত দেশৰ কৃষিৰ গ্ৰাফ নিম্নমুখী হ’ব পাৰে বুলিয়ে আশংকা কৰা হৈছে । এই কাকতি ফৰিঙৰ জাকে দিনে ১৫০কিলোমিটাৰ পৰ্যন্ত উৰি যোৱাৰ লগতে এক বৰ্গ কিলোমিটাৰ স্থানৰ শস্যহানি কৰিব পাৰে ।
এটা কাকতি ফৰিঙৰ দলে এটা এদিনত ৩৫হেজাৰ মানুহৰ খাদ্য খোৱাৰ ক্ষমতা আছে । ৰাষ্ট্ৰীয় বতৰ বিজ্ঞান কেন্দ্ৰৰ প্ৰবীণ বিজ্ঞানী আৰ কে জেনামানিয়ে কয়,’আৰব সাগৰৰ ওপৰত সম্প্ৰতি যি ঘূর্ণীবতাহৰ সৃষ্টি হৈছে, তাৰ ফলত উত্তৰ ভাৰতত আৰ্দ্ৰতা বৃদ্ধি পাইছে আৰু বৰষুণৰ সম্ভাৱনা আছে । ইতিমধ্যেই পূব ৰাজস্থানৰ কিছু অংশত বৰষুণ পৰিছে । উত্তৰ ভাৰততো এই বছৰ বৰষুণ পূৰ্বৰ তুলনাত বেছি হোৱাৰ সম্ভাৱনা আছে ।একেদৰে পূব ভাৰততো বৰ্ষাত কাকতি ফৰিঙৰ বংশবিস্তাৰৰ উপযুক্ত বতৰ সৃষ্টি হ’ব।’
ধাৰণা কৰা হৈছে যে কাকতি ফৰিঙৰ দলে বৰ্ষাৰ পূৰ্বেই ভাৰতৰ পূব দিশলৈ অগ্ৰসৰ হ’ব । ইয়াৰে এটা জাকে ইতিমধ্যে ভূপালৰ উত্তৰ-পূবত উপস্থিত হৈছিল । কিন্তু বংগোপসাগৰৰ মহাঘূর্ণী আমপানৰ পশ্চিম বায়ুৰ প্ৰভাৱত জাকটোৰ যাত্রাপথ ঘূৰি যায় । ৰাজস্থানলৈ জুলাই পৰ্যন্ত ফৰিঙৰ দল যাব পাৰে । অনুকূল বতৰ হোৱাৰ বাবে পূব দিশৰ বিহাৰ আৰু ওড়িছা পৰ্যন্ত কাকতি ফৰিঙৰ দল যোৱাৰ সম্ভাৱনা আছে । অৱশ্যে পশ্চিমা বায়ুৰ প্ৰভাৱত জাকটোৱে পুনৰ ৰাজস্থানলৈ ঘূৰি যোৱাৰে সম্ভাৱনা অধিক বুলি এই পৰ্যন্ত বিশেষজ্ঞই অনুমান কৰিছে । অৱশ্যে দক্ষিণ ভাৰতত কাকতি ফৰিঙৰ জাকে প্ৰৱেশ নকৰিব বুলিয়ে ধাৰণা কৰা হৈছে ।