নিজৰ আপোনজনক হেৰুৱাৰ দুখ মানুহতকৈ যেন জীৱ জন্তুৱে অধিক বুজি পায়। এই কথাকে যেন প্ৰতিপন্ন কৰিছে সুশান্ত সিং ৰাজপুতৰ পোহনীয়া কুকুৰ ফজে ৷ সুশান্ত সিং ৰাজপুতে আত্মহত্যা কৰাৰ পিছৰে পৰা অভিনেতাজনৰ ঘৰৰ প্ৰত্যেকটো কোঠাত ফজে বিচাৰিছে মালিকক ৷ জন্তু হ’লেও সুশান্তক হেৰুৱাই নিঠৰুৱা হোৱা ফজৰ ফ’টো আৰু ভিডিঅ’ এই কেইদিন ছ’চিয়েল মিডিয়াত সকলোৱে প্ৰত্যক্ষ কৰিছে ৷ এই ভিডিঅ’টোত দেখা গৈছে যে ফজে সুশান্তৰ ঘৰৰ প্ৰত্যেকটো কোঠাত বিচাৰিছে মালিকক। মালিকক বিচাৰি নাপাই পুনৰ ঘৰৰ কোনোবা কোণত শান্তিত বহি ৰৈছে ফজ ৷ কেতিয়াবা আকৌ ফজে মোবাইলৰ স্কীনত সুশান্তক চাইছে ৷ কিজানিবা মালিকৰ এষাৰ মাতকে শুনেই ।
ইয়াৰ পিছতে মালিকৰ পৰা কোনো প্ৰতিক্ৰিয়া নাপাই শান্ত হৈ পৰিছে ফজ৷ চকুৰে অহৰহ বৈ আছে পানী ৷ সম্প্ৰতি সুশান্ত সিং ৰাজপুতৰ পোহনীয়া কুকুৰ ফজক লৈ ছ’চিয়েল মিডিয়াত অনুৰাগীৰ মাজত বিভিন্ন প্ৰতিক্ৰিয়া অব্যাহত আছে ৷ বিগ বছৰ বিজেতা মনৱীৰ গুৰ্জৰে ফজ আৰু সুশান্তৰ এখন ফ’টো আপলোড কৰি টুইটাৰ যোগে লিখে “ভাই বেলেগে তোমাৰ মূল্য বুজি পাওঁক বা নাপাওঁক, কিন্তু ফজে তোমাৰ মূল্য বুজি পাই” ৷
ইফালে বিগত সময়ত সুশান্তে মৰমৰ ফজক লৈ এটি প’ষ্ট শ্বেয়াৰ কৰিছিল ছ’চিয়েল মিডিয়াত ৷ সুশান্তে লিখিছিল “If you remember me, then I don’t care if everyone else forgets#my love#Fudge.
ইপিনে, সোমবাৰে সৰ্বত্ৰে প্ৰচাৰ হৈছিল যে, সুশান্ত সিং ৰাজপুতে আত্মহত্যা কৰাৰ পিছত খাবলৈ এৰি মৃত্যু হৈছে ফজৰ ৷ কিন্তু সুশান্তৰ এজন ঘনিষ্ঠৰ মন্তব্য যে এই বাতৰি ভূৱা ৷ ফজৰ লগতে প্ৰয়াত সুশান্তৰ বাকী কুকুৰকেইটাৰ স্বাস্থ্য সম্প্ৰতি ঠিকে আছে বুলি জনায় বন্ধুজনে। উল্লেখযোগ্য যে ১৪ জুনত সুশান্ত সিং ৰাজপুতে আত্মহত্যা কৰাৰ পিছত সমগ্ৰ বলীউডৰ বিতৰ্কৰ সূত্ৰপাত হৈছে ৷ সম্প্ৰতি আৰক্ষীয়ে এই আত্মহত্যাৰ প্ৰসংগত তদন্ত অব্যাহত ৰাখিছে। সকলোৱে আশা কৰিছে ন্যায় পাওক সুশান্তে ।
