অসমত ক’ভিড-১৯ ত আক্ৰান্তৰ সংখ্যা ব্যাপক হাৰত বৃদ্ধিৰ সমান্তৰালভাৱে সুস্থ হোৱা লোকৰ সংখ্যাও উৰ্ধ্বমুখী হৈছে । ৰাজ্যত সুস্থ হোৱা লোকৰ হাৰ ইতিমধ্যে ৬৯.৫৭ শতাংশলৈ বৃদ্ধি হৈছে । ইয়াৰ পৰিপেক্ষিতত সুস্থ হোৱা লোকৰ হাৰেৰে অসম দেশৰ পাঁচখন ৰাজ্যৰ তালিকাত অন্তভূক্ত হোৱা বুলি স্বাস্থ্যমন্ত্ৰী ড° হিমন্ত বিশ্ব শৰ্মাই সদৰী কৰিছে ৷ কিন্তু এয়া ৰাজ্যত কৰ’নাৰ বিৰুদ্ধে যুঁজৰ “সফলতা”ৰ এটা দিশ ৷ আনটো দিশ অতি উদ্বেগজনক ।এই ৰোগৰ পৰা সুস্থ হৈ অধিকাংশ লোক আক্ৰান্ত হৈছে সামাজিক অসুস্থতাত ৷ আৰোগ্য হৈ চিকিৎসালয়ৰ পাছত আন প্ৰক্ৰিয়াসমূহ পাৰ কৰি স্বগৃহত উপস্থিত হৈছে অধিকাংশ লোক,কিন্তু তাৰ বেছিভাগেই বলি হৈছে সামাজিক অস্পৃশ্যতাৰ ৷ কৰ’নাত আক্ৰান্ত হোৱাটো সেইসকল লোকৰ বাবে যেন এক অপৰাধহে ৷তেনে সামাজিক আচৰণৰ সন্মুখীন হৈছে এই লোকসকল ৷ সুস্থ হৈ উভতি যোৱা ৮০ শতাংশ লোকেই সামাজিক নিৰ্যাতনৰ বলি হোৱা বুলি উদ্বেগেৰে “দৈনিক অগ্ৰদূত”ৰ আগত সদৰী কৰে ৰাজ্যৰ স্বাস্থ্য বিভাগৰ “মনন” আঁচনিখনক নেতৃত্ব দিয়াসকলৰ অন্যতম গুৱাহাটী চিকিৎসা মহাবিদ্যালয় হাস্পতালৰ মানসিক ৰোগ বিভাগৰ অধ্যাপিকা তথা চিকিৎসক ড° বৰ্ণালী দাসে ।
তেওঁ কয় যে দেশৰ ভিতৰতে প্ৰথম এই আঁচনিখনৰ জৰিয়তে ২২০ জনীয়া এটি বিশেষ প্ৰশিক্ষিত দলে প্ৰতিদিনে কৰ’নাত আক্ৰান্ত আৰু কোৱাৰেন্টাইনত থকা লোকসকলৰ লগত বাৰ্তালাপ কৰি তেওঁলোকৰ মানসিক অৱস্থাৰ বুজ লোৱাৰ উপৰি প্ৰয়োজনীয় পৰামৰ্শ আগবঢ়ায় ।একেদৰে সুস্থ হোৱাসকলৰ লগতো যোগাযোগ কৰা হয় । ড° দাসে কয়, ” সুস্থ হৈ ঘৰলৈ যোৱাসকলৰ বেছিভাগেই নতুন এক সমস্যাৰ সন্মুখীন হৈছে। যেনে,কৰ’নাত আক্ৰান্ত হৈছিল বাবেই আজৰ দৰে ঘৰৰ ওচৰৰ দোকানখনে কোনো সামগ্ৰী বিক্ৰী নকৰা হৈছে ,মানুহৰ দৃষ্টিও তেওঁলোকৰ প্ৰতি স্বাভাৱিক নহয় আদি সামাজিক সমস্যাবোৰৰ হৈছে। এইবোৰৰ বিৰুদ্ধে যুঁজাৰু একমাত্ৰ অস্ত্ৰ হৈছে সামাজিক সজাগতা সৃষ্টি ৷ বেছিভাগ আক্ৰান্তই হৈছে বহিঃৰাজ্যৰ পৰা ওভতি অহা লোক ৷ ভৱিষ্যতক লৈ তেওঁলোক যথেষ্ট উদ্বিগ্ন ।তাৰ মাজতে সন্মুখীন হোৱা এনে সামাজিক জটিলতাবোৰ স্বাভাৱিকতে গুৰুতৰ ।
ড° কৰবী দাসে সদৰী কৰা অনুসৰি কৰ’নাত আক্ৰান্ত হোৱাটো দোষ হ’ব নোৱাৰে। যিকোনো লোক এই ৰোগত আক্ৰান্ত হ’ব পাৰে ৷প্ৰয়োজন কেৱল সুৰক্ষাক লৈ সজাগতা বৃদ্ধি কৰা ৷ কৰ’নাত আক্ৰান্ত হোৱাজন কেতিয়াও অস্পৃশ্য হ’বই নোৱাৰে বুলি মন্তব্য কৰি চিকিৎসকগৰাকীয়ে লগতে কয়”কৰ’নাত কবলত পৰি কৰ্মক্ষেত্ৰ এৰি আহিবলগীয়া হোৱা বাবে অধিকাংশৰে দুশ্চিন্তা বৃদ্ধি পাইছে ৷ তাৰ পাছত নতুন ধৰণৰ সমস্যা গঢ়ি উঠাটো বহুতৰ বাবে চৰম অশান্তিৰ কাৰক হৈ পৰিছে ৷গুৰুতৰ হোৱা এই সমস্যা কি ধৰণৰ সমাজত গা কৰি উঠিছে? ইয়াৰ উত্তৰত ডা° দাসে কয় যে গ্ৰামাঞ্চলতে সমস্যাটোৰ প্ৰভাৱ বেছিকৈ পৰিছে ৷ চহৰ অঞ্চলত তুলনামূলকভাৱে ইয়াৰ প্ৰভাৱ কম ৷চহৰ অঞ্চলত বহু মানুহে কাষৰ পৰিয়ালটোৰ বিষয়ে নাজানে ৷গতিকে খবৰবোৰৰ বিস্তাৰো কমকৈ হয় ৷ আনহাতে, গাঁৱত ইয়াৰ বিপৰীত ৷’