কৰ’নাৰ ভয়াৱহতাৰ বাবে মহানগৰীত হ্ৰাস পাইছে শ্ৰমিকৰ সংখ্যা । ফলত প্ৰকল্প ৰূপায়ণৰ ক্ষেত্ৰত বাধাগ্ৰস্ত হৈছে ৰাজ্য চৰকাৰৰ বিভিন্ন বিভাগ । বিশেষকৈ প্ৰয়োজনীয় শ্ৰমিক তথা কেঁচামালৰ অভাৱৰ বাবেই মহানগৰীত স্থবিৰ হৈ পৰিছে গড়কাপ্তানী বিভাগৰ কাম-কাজ । দিছপুৰৰ সূত্ৰই এই কথা সদৰী কৰি জনোৱা মতে, কৰ’নাৰ সংক্ৰমণ প্ৰতিৰোধৰ স্বাৰ্থত অব্যাহত থকা তলাবন্ধৰ মাজতো বিভিন্ন প্ৰকল্প ৰূপায়নৰ বাবে নিয়মিতভাৱে ঠিকা আৱন্তন দিছে গড়কাপ্তানী বিভাগে ।
বিভিন্ন আঁচনিৰ অধীনত বিভাগটোৱে ঠিকা আৱন্তন দিলেও পৰ্যাপ্ত শ্ৰমিক তথা কেঁচা সামগ্ৰীৰ অভাৱত সংশ্লিষ্ট ঠিকাদাৰসকলে আৰম্ভ কৰিব পৰা নাই বহু সংখ্যক প্ৰকল্পৰ কাম । ইয়াৰ মাজতো অৱশ্যে একাংশ ঠিকাদাৰে সীমিত সংখ্যক শ্ৰমিকৰে অব্যাহত ৰাখিছে কাম-কাজ । এইসকল ঠিকাদাৰৰ অধিকাংশই যথেষ্ঠ প্ৰভাৱশালী । ইয়াৰ বাবে মহানগৰীৰ বিভিন্ন প্ৰান্তত নিৰ্মীয়মান অৱস্থাত থকা উৰণীয়া সেতু, পথ বিভাজকৰ মেৰামতি, নিৰ্মাণ তথা সৌন্দৰ্যবৰ্ধনৰ কাম-কাজ অব্যাহত থকা বুলি সূত্ৰটোৱে জনায়।
কি ধৰণৰ কাম স্থৱিৰ ?
মহানগৰীৰ মূল পথসমূহত তলাবন্ধৰ মাজতো অব্যাহত আছে বিভিন্ন কাম-কাজ, কিন্তু মহানগৰীৰ বিভিন্ন পথ, উপপথৰ উন্নয়নৰ বাবে বিভিন্ন আঁচনি অধীনত ধাৰ্য কৰা প্ৰকল্পসমূহ ৰূপায়ণৰ ক্ষেত্ৰত সৃষ্টি হৈছে ব্যাপক জটিলতা । এই সম্পৰ্কত সূত্ৰটোৱে জনোৱা মতে, মহানগৰীৰ বিভিন্ন প্ৰান্তৰ পথ, উপ-পথৰ নিৰ্মাণ তথা মেৰামতিৰ নামত বৰ্তমানে ৪০-৬০ কোটি টকাৰ ঠিকা ইতিমধ্যে আৱন্টন দিছে গড়কাপ্তানী বিভাগে; কিন্তু সংশ্লিষ্ট প্ৰকল্পসমূহৰ অধিকাংশই আৰম্ভ কৰিব পৰা নাই ঠিকাদাৰ সকলে । ইয়াৰ মূলতে প্ৰয়োজনীয় শ্ৰমিক অাৰু কেঁচামালৰ অভাৱ । কৰ’নাৰ সংক্ৰমণ প্ৰতিৰোধৰ স্বাৰ্থত কামৰূপ মহানগৰ জিলাত বৰ্তমানো অব্যাহত অাছে সম্পূৰ্ণ তলাবন্ধ । লগতে সন্ধিয়া সাত বজাৰ পৰা বলবৎ হয় সান্ধ্য আইন।
অৱশ্যে উন্নয়নমূলক কাম-কাজত যাতে স্থৱিৰতা নাহে, তাৰ প্ৰতি লক্ষ্য ৰাখি উন্নয়নমূলক কাম-কাজত জড়িতসকলক তলাবন্ধ অাৰু সান্ধ্য আইনৰ পৰা ৰেহাই দিয়ে ৰাজ্য চৰকাৰে। তৎসত্বেও কৰ’নাৰ ভয়াৱহতাৰ বাবে গাঁৱলৈ উভতি যোৱা অধিকাংশ শ্ৰমিক বৰ্তমানো গুৱাহাটীত উপস্থিত হোৱা নাই । ফলত আৱন্টিত প্ৰকল্পৰ বিপৰীতে মহানগৰীত বৰ্ত্তমানে নাই পৰ্যাপ্ত সংখ্যাক শ্ৰমিক। কেবল শ্ৰমিকেই নহয়, প্ৰয়োজনীয় শিল-বালিৰো অভাৱ হৈছে।