হলিউডৰ একচন ধর্মী ছবি উপভোগ কৰা সকলে নিশ্চয় দেখা পাইছে জেমছ বণ্ডৰ বিশেষ প্ৰযুক্তি সম্পন্ন গাড়ী । এই গাড়ীত বহি যাত্ৰাৰ সোৱাদ ল’বলৈও বহুতে হয়তো কল্পনা কৰে । অৱশ্যে এতিয়াৰে পৰা তেনে স্বপ্নবিলাসী লোকেও ক্ৰয় কৰিব পাৰিব জেমছ বণ্ডৰ সেই হাই-টেক যুক্ত গাড়ী । উল্লেখ্য যে জেমছ বণ্ড শৃংখলাৰ অধিকাংশ ছবিতে এষ্টন মাৰ্টিন গাড়ী চলোৱা দেখা গৈছে ‘এজেন্ট ০০৭’ক । এইবাৰ বণ্ডে ব্যৱহাৰ কৰা বিলাসী গাড়ীয়ে সাধাৰণ লোকৰ বাবেও অপেক্ষা কৰিছে । সাধাৰণ মানুহৰ বাবে সম্প্ৰতি মাত্ৰ ২৫ খন গাড়ী নিৰ্মাণ কৰিছে এষ্টন মাৰ্টিনে । ছবিত দেখা গাড়ী খনত আছিল নম্বৰ সলনি হোৱা ৰিভলভিং নম্বৰপ্লেট , গুলি প্ৰতিৰোধ কৰাৰ বাবে পাছফালৰ ঢাল, গীয়েৰ ষ্টিকত এটা বিশেষ বুটামসহ অনেক সুবিধা।
এইবাৰ সাধাৰণ ক্রেতাসকলৰ বাবেও এনে বহুতো বৈশিষ্ট্যসম্পন্ন গাড়ী এষ্টন মাৰ্টিনে বজাৰলৈ অনাৰ বাবে সাজু হৈছে । পিছে, ছবিত যিবোৰ সুবিধা দেখুওৱা হৈছে, তাৰ সকলো বোৰ সুবিধা অৱশ্যে সাধাৰণ মানুহৰ বাবে ৰাখিব পৰা নাযাব । সেয়ে সেইবোৰ গেজেট কেৱল প্ৰতীকী ৰূপত গাড়ীত ৰখা হৈছে । শত্ৰুৰ গাড়ীক সমস্যাত পেলাবলৈ ৰাস্তাত তেল ঢলাৰ যি ব্যৱস্থা আছিল, তাৰ পৰা পানী ওলোৱাৰ ব্যৱস্থা ৰখা হৈছে । অৱশ্যে ছিট ইজেকচন ৰখা হোৱা নাই । তথাপি যাত্ৰীৰ দিশৰ ছাদ আঁতৰাই দিয়াৰ ব্যৱস্থা ৰাখিছে । এই গাড়ী খনৰ মূল্য ভাৰতীয় মুদ্ৰাত প্ৰায় ৩১ কোটি টকা ।