সামাজিক মাধ্যম ফেচবুকত উচতনিমূলক আৰু সাম্প্ৰদায়িক মন্তব্য প্ৰদানৰ অভিযোগ তুলি কাৰ্বি ছাত্ৰ সন্থা, অসম জাতীয়তাবাদী যুৱ ছাত্ৰ পৰিষদ আৰু এছ.ৱাই.চি নামৰ তিনি ছাত্ৰ সংগঠনে বোকাজান থানাত এক এজাহাৰ দাখিল কৰিছে ৷ সংগঠন কেইটাই গোলাঘাটৰ ঋতুৰাজ বৰা নামৰ এজন যুৱকৰ বিৰুদ্ধে তৰিছে এই অভিযোগ ৷ এজাহাৰত উল্লেখ কৰা মতে, ২৮ জুলাইত কাৰ্বি আংলংৰ বোকাজানৰ এখন দলং সম্পৰ্কে সংবাদ মাধ্যমত এক বাতৰি প্ৰকাশ হৈছিল আৰু সেই বাতৰিটো ফেচবুকত সংলগ্ন কৰিছিল বিভিন্ন জনে ৷ বহু লোকে বাতৰিটো সম্পৰ্কত ফেচবুকত মন্তব্য দিছিল ৷ ‘
তাৰে কিছু সংখ্যকে কাৰ্বি আংলঙক লৈ তাচ্ছিল্য মন্তব্য প্ৰদান কৰিছিল যাৰ বাবে জিলাখনত ব্যাপক প্ৰতিক্ৰিয়াৰ সৃষ্টি হৈছিল ৷ এই প্ৰসঙ্গত বৃহস্পতিবাৰে হাওৰাঘাটৰ পৰা চাৰিজন লোকক আৰক্ষীয়ে আটক কৰাৰ পাছত বোকাজান থানাত উক্ত সংগঠন কেইটাই গোলাঘাটৰ যুৱক জনৰ ওপৰতো অভিযোগ তুলি এজাহাৰ প্ৰদান কৰিছে ৷ সংগঠন কেইটাই যুৱক জনৰ ওপৰত বিহিত ব্যৱস্থা গ্ৰহণৰ বাবে দাবী তুলি এজাহাৰত উল্লেখ কৰে যে এনে মন্তব্যই সাধাৰণ লোকৰ মাজত ভুল বুজাবুজিৰ সৃষ্টি কৰিব পাৰে ৷
