পুনৰ জেৰাৰ সন্মুখীন জেৰাৰ হ’ল ডিব্ৰুগড় জিলাৰ নগৰ উন্নয়ন আৰু পৰিকল্পনা শাখাৰ কনিষ্ঠ অভিযন্তা নৱকান্ত পাতিৰ ৷ এ পি এছ চিৰ নিলম্বিত অধ্যক্ষ ৰাকেশ পালৰে মিলি কম সময়ৰ ভিতৰতে আয় বৰ্হিভূত সম্পত্তিৰ গৰাকী হৈ পৰা পাতিৰক পুনৰ সুদীৰ্ঘ তিনি ঘন্টা ধৰি অসম লোকসেৱা আয়োগৰ কেলেংকাৰি সম্পৰ্কত ডিব্ৰুগড় আৰক্ষী থানাত ৰজু হৈ থকা ৯৩৬/২০১৬ নম্বৰ গোচৰৰ তদন্তকাৰী বিষয়া তথা গোলাঘাট জিলাৰ অতিৰিক্ত আৰক্ষী অধীক্ষক সুৰজিৎ সিং পানেছাৰে জেৰা কৰে ৷
আৰক্ষী সূত্ৰই এই কথা সদৰী কৰি কয় যে ডিব্ৰুগড়ৰ দন্ত চিকিৎসক ডা° অংশুমিতা গগৈয়ে দাখিল কৰা এজাহাৰৰ ভিত্তিত ডিব্ৰুগড় আৰক্ষী থানাত ৰজু হৈ থকা ৯৩৬/২০১৬ নম্বৰ গোচৰটো সঠিক নিৰীক্ষণৰ বাবে অসম আৰক্ষীৰ আৰক্ষী সঞ্চালক প্ৰধানে চি আই ডিৰ অতিৰিক্ত আৰক্ষী সঞ্চালক প্ৰধান ড° এল আৰ বিষ্ণয়ৰ অধ্যক্ষতাত এক বিশেষ নিৰীক্ষণকৰী গোট গঠন কৰা হয় ৷
এই নিৰীক্ষণকাৰী গোটে ডিব্ৰুগড় আৰক্ষী থানাত ৰজু হৈ থকা উক্ত গোচৰত ডা° গগৈৰ পৰা উৎকোচ লৈ ২০১৬ ৰ ২৭ অক্টোবৰত হাতে লোটে গ্ৰেপ্তাৰ হয় নিলম্বিত কনিষ্ঠ অভিযন্তা পাতিৰ ৷ এপি এছ চিৰ নিলম্বিত অধ্যক্ষ ৰাকেশ পালৰ অন্যতম দালাল ৰূপে চিহ্নিত হোৱা পাতিৰে অসম অসামৰিক আৰু অন্যান্য সেৱাৰ গুৰুত্বপূৰ্ণ পদত বাছনি কৰাৰ নামত উৎকোচ গ্ৰহণ কৰাৰ তথ্য আহৰণ কৰে তদন্তকাৰী বিষয়াই ।
ইয়াৰ ভিত্তিতে ভাৰতীয় ষ্টেট বেংকৰ ডিব্ৰুগড় শাখাত পাতিৰৰ নামত থকা দুটাকৈ বেংক একাউন্টৰ এটাত ২০১৩-১৫ ৰ ভিতৰত প্ৰায় এক কোটিৰ লেনদেন হোৱাটো বেংক কৰ্তৃপক্ষই নিশ্চিত কৰে । নগৰ উন্নয়ন আৰু পৰিকল্পনা শাখাৰ কনিষ্ঠ অভিযন্তা এজনৰ একাউণ্টত মাত্ৰ দুবছৰতে কোটি টকাৰ লেনদেনৰ বিষয়টো সংশ্লিষ্ট গোচৰৰ তদন্তকাৰী বিষয়াই সংশ্লিষ্ট গোচৰ বিশেষ নিৰীক্ষণকাৰী গোটক অৱগত কৰে ।
এই সকলো বোৰৰ ভিত্তিতে পানেছৰে পাতিৰক গোলাঘাট জিলাৰ আৰক্ষী অধীক্ষকৰ কাৰ্যালয়ত জেৰা কৰে বুলি সূত্ৰটোৱে জনায় । এ পি এছ ইৰ বিয়াগোম কেলেংকাৰিৰ অন্যতম অভিযুক্ত পাতিৰে জেৰাৰ সময়ত সংশ্লিষ্ট বেংক একাউণ্টত হোৱা লেনদেন তথা বৰ্তমানেও জমা থকা ধনৰাশিৰ প্ৰকৃত উৎসৰ সবিশেষ তথ্য দাখিল কৰিব নোৱাৰা বুলি সূত্ৰটোৱে জনায় ।
এ পি এছ ইৰ নিলম্বিত অধ্যক্ষ পালৰ আয়বৰ্হিভূত সম্পত্তি সম্পৰ্কত চি বি আই আৰু ই ডি পৃথকে পৃথকে তদন্ত অব্যাহত ৰখাৰ সময়ত পাটিৰৰ আয় বৰ্হিভূত সম্পত্তিক লৈএইবাৰ অসম আৰক্ষীয়ে তদন্ত আৰম্ভ কৰা বুলি সূত্ৰটোৱে জনায় ৷