যি সময়ত দেশত “বেটী পঢ়াও বেটী বচাও” শ্ল’গানৰে দেশৰ কন্যাসকলক সৰ্বতো প্ৰকাৰে আগুৱাই নিয়াৰ চেষ্টা কৰিছে, সেইসময়তে কৰিমগঞ্জৰ কালিগঞ্জত সংঘটিত হৈছে এটা হত্যাকাণ্ড ৷ বাৰে বাৰে পত্নী ছালমা বেগমে কন্যা সন্তান জন্ম দিয়াৰ খঙত নিজৰ নমহীয়া কন্যা সন্তানক হত্যা কৰি কবৰ দিলে উছমান আলিয়ে ৷ অৱশ্যে আদালতৰ নিৰ্দেশত আজি কবৰৰ পৰা মৃতদেহটো উলিওৱা হয় ৷
ঘটনাৰ বিৱৰণ অনুসৰি আঠ বছৰ পূৰ্বে বিবাহ পাশত আৱদ্ধ হৈছিল উছমান আলি আৰু ছালমা বেগমৰ ৷ কিন্তু পুত্ৰ সন্তানৰ আশা কৰি ছালমাৰ ঘৰত জন্ম হৈছিল চাৰিগৰাকীকৈ কন্যা সন্তানৰ ৷ এই বিষয়টোক লৈ স্বামী-স্ত্ৰীৰ মাজত কাজিয়াৰ সূত্ৰপাত হৈছিল । কিন্তু শনিবাৰে ছালমাৰ ওপৰত শাৰীৰিক নিৰ্যাতনৰ মাত্ৰাৰ পৰিমাণ বৃদ্ধি হৈছিল ।
ইয়াৰ পিছত ছালমাই আশ্ৰয় লৈছিল পিতৃগৃহত ৷ ইপিনে উছমান আলিয়ে ফোনযোগে ছালমাক জনাইছিল যে তেওঁলোকৰ নমহীয়া কন্যা সন্তানটিৰ মৃত্যু হৈছে। ইয়াৰ লগে লগে ছালমাই আৰক্ষীৰ ওচৰত স্বামী উছমানৰ বিৰুদ্ধে এখন এজাহাৰ দাখিল কৰে ৷ আৰু ইয়াৰ পিছতে উন্মোচিত হয় এই অভাৱনীয় কাণ্ড ৷
আনহাতে অভিযুক্ত উছমান আলি বৰ্তমান পলাতক অৱস্থাত আছে ৷ আৰু এই সমগ্ৰ ঘটনাৰ কেন্দ্ৰ কৰি কালিগঞ্জত তীব্ৰ চাঞ্চল্যৰ সৃষ্টি হৈছে । সম্প্ৰতি আৰক্ষীয়ে উছমান আলিৰ বিৰুদ্ধে কি ব্যৱস্থা হাতত ল’ব সেয়া হ’ব লক্ষ্যণীয় ৷
