অসমৰ আদীবাসী সকলক জনজাতিকৰণ নকৰিলে অসম আকৌ উত্তাল কৰাৰ শ্লোগানেৰে আছাই দুঘন্টীয়া ধৰ্ণা কাৰ্য্যসূচী ৰূপায়ন কৰে চিৰাং জিলা সদৰ কাজলগাঁওত ।
আদিবাসী সকলক জনজাতিকৰণ কৰা, বনাঞ্চলত বসবাস কৰা আদিবাসী সকলক ভূমিপট্টা প্ৰদান কৰা, যুদ্ধবিৰতিত থকা আদীবাসী বিভিন্ন উগ্ৰপন্থী সংগঠনৰ সদস্য সকলক পুনৰসংস্থাপন দিয়া, আদিবাসী শিক্ষিত যুৱক-যুৱতীক নিয়োগৰ সুবিধা প্ৰদান কৰা আৰু ১৯৯৬-১৯৯৮ৰ পৰা কে’বাটাও গোষ্ঠী সংঘৰ্ষত ক্ষতিগ্ৰস্ত হোৱা আদিবাসী সকলক পুনৰসংস্থাপন দিয়াৰ দাবীৰে পুৱা ১১ বজাৰ পৰা ১ বজালৈ এই ধৰ্ণা কাৰ্য্যসূচী ৰূপায়ন কৰে ছাত্ৰ সংগঠনটোৱে ।
এই পাঁচ দফীয়া দাবী লৈ আজি ধৰ্ণা দিয়াৰ পিছতে জিলা উপায়ুক্তৰ জৰিয়তে মুখ্যমন্ত্ৰীলৈ স্মাৰক প্ৰদান কৰে । অসমৰ অতি পিচপৰা জনগোষ্ঠী আদিবাসী সকলে দীৰ্ঘদিনৰ পৰাইজনজাতিকৰণৰ বাবে সংগ্ৰাম অব্যাহত ৰাখিছিল আৰু এতিয়াও সংগ্ৰাম অব্যাহত ৰাখিছে ।
কিন্তু চৰকাৰে জনগোষ্ঠীটোৰ জনজাতিকৰণকে ধৰি বিভিন্ন দাবী সমাধানৰ ক্ষেত্ৰত কোনো পদক্ষেপ গ্ৰহণ কৰা পৰিলক্ষিত হোৱা নাই । সেয়ে আগন্তুক বিধান সভা নিৰ্বাচনৰ পূৰ্বেই দাবী সমূহ পূৰণ নকৰিলে বিজেপি নেতৃত্বাধীন চৰকাৰক এসেকা দিয়াৰ কথাও জনায় আছাৰ নেতৃত্বই।
