লোকসভাত কংগ্ৰেছৰ নেতা অধীৰ চৌধুৰীয়ে প্ৰয়াত অভিনেতা সুশান্ত সিং ৰাজপুতৰ গাৰ্লফ্ৰেণ্ড ৰিয়া চক্ৰৱৰ্তীক অনতিপলমে মুকলি কৰি দিয়াৰ দাবী কৰিছে ৷ ইয়াৰ পাছত বলীউডৰ সততে চৰ্চাত থকা অভিনেত্ৰী স্বৰা ভাস্কৰে প্ৰতিক্ৰিয়া প্ৰকাশ কৰে । স্বৰাই ৰিয়া চক্ৰৱৰ্তীৰ মুকলিৰ দাবীত অধীৰ ৰঞ্জন চৌধুৰীৰ দাবীক প্ৰশংসা কৰিছে ৷ স্বৰাই টুইটাৰ জৰিয়তে কয় “Well Done Sir” ৷ সম্প্ৰতি স্বৰা ভাস্কৰৰ এই টুইটটো যথেষ্ট চৰ্চা লাভ কৰিছে ।
Well done sir! 👏🏽👏🏽👏🏽👏🏽👏🏽 #ReleaseRheaChakraborty https://t.co/a5J7IbQgZM
— Swara Bhasker (@ReallySwara) October 4, 2020
অধীৰ ৰঞ্জন চৌধুৰীয়ে টুইটাৰ জৰিয়তে কয় “আমি সকলো অভিনেতা সুশান্তৰ মৃত্যুত অত্যন্ত দুখী । কিন্তু এগৰাকী মহিলাক অভিযুক্তৰ ৰূপত সজাই সুশান্তক সন্মানিত কৰিব পৰা নাযায় । মই প্ৰথমতেই কৈছিলো ৰিয়া চক্ৰৱৰ্তী এগৰাকী নিৰ্দোষী মহিলা ৷ তেওঁ ৰাজনৈতিক ষড়যন্ত্ৰৰ বলী হৈছে ।”
উল্লেখযোগ্য যে শেহতীয়াকৈ AAIMS ৰ এক পেনেলে সদৰী কৰে যে অভিনেতা সুশান্ত সিং ৰাজপুতক হত্যা কৰা নাছিল । তেওঁ আত্মহত্যাহে কৰিছিল ৷ AIIMS ৰ এক বিশেষ সূত্ৰৰ মতে পেনেলে পৰিয়াল আৰু বন্ধুসকলৰ সুশান্তক হত্যা কৰা অভিযোগক খাৰিজ কৰে । ৩৪ বছৰীয়া বলীউডৰ অভিনেতা সুশান্ত সিং ৰাজপুতৰ মুম্বাইস্থিত বাসগৃহত ১৪ জুনত মৃতদেহ পোৱা গৈছিল ৷ ইয়াৰ পাছতে মুম্বাইৰ পুলিছে সুশান্তে আত্মহত্যা কৰিছিল বুলি প্ৰকাশ কৰিলেও ছ’চিয়েল মিডিয়াত অভিনেতাজনৰ অনুৰাগী আৰু পৰিয়ালে এয়া হত্যা বুলি অভিযোগ কৰিছিল । সুশান্তক ন্যায় দিয়াৰ কাৰণে চলোৱা অভিযান আৰু পৰিয়ালৰ সন্দেহৰ পাছত এই সমগ্ৰ ঘটনাটো তদন্তৰ কাৰণে CBI ৰ হাতত দিয়া হয় ।
সূত্ৰৰ মতে AIIMSৰ পেনেলে তদন্ত সম্পূৰ্ণ কৰিছে ৷ সম্প্ৰতি CBIয়ে AIIMS ৰ প্ৰতিবেদনৰ লগত নিজৰ প্ৰতিবেদন সংলগ্ন কৰি তদন্ত আগবঢ়াব পাৰে ৷ ইপিনে মুম্বাই পুলিছে এইয়া আত্মহত্যা বুলি ধৰি লৈ তদন্ত আগবঢ়াব ৷ উল্লেখযোগ্য যে সুশান্তৰ আত্মহত্যা আৰু মাদকদ্ৰব্য সৰবৰাহৰ অভিযোগত অভিযুক্ত গাৰ্লফ্ৰেণ্ড ৰিয়া এতিয়াও কাৰাগাৰত ৷ আনহাতে মাদকদ্ৰব্য সৰবৰাহ আৰু সেৱনত কেৱল ৰিয়া চক্ৰৱৰ্তীয়েই নহয় বলীউডৰ বহু সুন্দৰী জড়িত আছে ৷ এই সন্দৰ্ভত সম্প্ৰতি সোধপোছ অব্যাহত ৰাখিছে ৷