চিৰাঙত আজি উপস্থিত হোৱা বিটিআৰৰ নৱ নিৰ্ব্বাচিত মুখ্য কাৰ্যবাহী সদস্য প্ৰমোদ বড়োক ৰাজহুৱা সম্বৰ্ধনা জনোৱা হয়। গুৱাহাটীৰ পৰা পোনে পোনে বিয়লি দুই বজাত আহি চিৰাঙত উপস্থিত হোৱা বড়োক প্ৰথমে বিজনীৰ ৩১ নং ৰাষ্ট্ৰীয় ঘাইপথৰ টোল প্লাজাত এবছু-ইউপিপিএল দলৰ সদস্য-সমৰ্থক সকলে সম্বৰ্ধনা জনায় ।
তাৰ পাছত কাজলগাঁও ৰাষ্ট্ৰীয় ঘাই পথৰ পৰা সমদল কৰি চিৰাং জিলা এবছু কাৰ্য্যালয়লৈ যায় আৰু তাতে সম্বৰ্ধনা জ্ঞাপন কৰে । ইয়াৰ পাছত জিলাখনৰ কাশিকত্ৰা আৰু স্যামথাইবাৰীতো ৰাজহুৱা সম্বৰ্ধনা জনায় ইউপিপিএল দলৰ সভাপতি তথা বিটিআৰৰ নৱ নিৰ্বাচিত মুখ্য কাৰ্যবাহী সদস্য প্ৰমোদ বড়োক।
সম্বৰ্ধনাত বড়োই কয় যে চৰকাৰ গঠনৰ পাছত প্ৰথম দিনাৰ পৰাই সকলো জাতি জনগোষ্ঠীৰ উন্নয়নৰ বাবে কাম কৰি যাব। যিহেতু নিয়ম কোনেও অৱজ্ঞা কৰিব নোৱাৰে সেয়ে জ্যেষ্ঠ হিচাবে হাগ্ৰামা মহিলাৰীৰ সহযোগিতা বিচাৰে প্ৰমোদ বড়োই।
পুৰ্ব্বৰ সকলো কথা পাহৰি নতুন উদ্যম লৈ হাগ্ৰামা মহিলাৰীৰ সহযোগিতা লৈ বিটিআৰ বাসীৰ উন্নতি আৰু প্ৰগতিৰ বাবে কাম কৰি যোৱাৰ প্ৰতিশ্ৰুতি দিয়ে প্ৰমোদ বড়োই।লগতে বিটিআৰৰ পৰা বড়ো অবড়োৰ ৰাজনীতি নিশেষ কৰাৰ বাবেই সাংসদ নৱ শৰণীয়াৰ সংগ লৈ আগবাঢ়ি যোৱাৰ কথাও জনায় প্ৰমোদ বড়োই ।
মঙ্গলবাৰে কোকৰাঝাৰত শপত গ্ৰহণ হব আৰু তাত মুখ্যমন্ত্ৰী সৰ্ব্বানন্দ সোনোৱাল, বিত্ত মন্ত্ৰী হিমন্ত বিশ্ব শৰ্মা সহ আন্যান্য মন্ত্ৰী সকল উপস্থিত থাকিব বুলিও জনায় প্ৰমোদ বড়োই।
আনহাতে চিৰাং জিলাৰ সদৰ কাজলগাঁওত প্ৰমোদ বড়োৰ আগমনৰ খবৰ পোৱাৰ লগে লগে হেজাৰ হেজাৰ লোকে ভৰি পৰে চিৰাং জিলাৰ কাজলগাঁও। ব্যাপক উৎসাহ এবছু-ইউপিপিএল দলৰ সমৰ্থকৰ মাজত। নাচ-গান,বাদ্যযন্ত্ৰৰ লগতে ফটকা ফুটাই এক আনন্দ মুখৰ পৰিৱেশ গঢ়ি তোলে চিৰাঙত।
