ধুবুৰী নিৰ্বাচন জিলাৰ অন্তৰ্গত ধুবুৰী, গৌৰীপুৰ আৰু গোলকগঞ্জ বিধানসভা সমষ্টিৰ নিৰ্বাচন প্ৰক্ৰিয়া নিকা আৰু স্বচ্ছ কৰিবলৈ আৰু ভোটাৰ ৰাইজৰ সুবিধাৰ্থে প্ৰশাসনে গ্ৰহণ কৰিছে বিভিন্ন পদক্ষেপ ৷ ইয়াৰ অংশ হিচাপে স্থাপন কৰা হৈছে অভিযোগ নিয়ন্ত্ৰণ কক্ষ ৷ জিলা নিৰ্বাচন বিষয়া তথা জিলা উপায়ুক্ত দেৱ কুমাৰ কলিতাই সদৰি কৰা মতে, ভোটাৰ ৰাইজে বিধানসভা নিৰ্বাচনৰ স’তে সম্পৰ্কিত যিকোনো অভিযোগ নিৰ্দিষ্ট নম্বৰলৈ ফোন কৰি জনাব পাৰিব ৷
ধুবুৰী সমষ্টিৰ ভোটাৰে ০৩৬৬২-২৩০০৬২ নম্বৰলৈ, গৌৰীপুৰ সমষ্টিৰ জনতাই ০৩৬৬২-২৩০০৬৩ নম্বৰলৈ আৰু গোলকগঞ্জ সমষ্টিৰ ৰাইজে ০৩৬৬২-২৩০০৬৪ নম্বৰলৈ ফোন কৰি নিৰ্বাচনী আচৰণ বিধি ভংগকে ধৰি নিৰ্বাচন সম্পৰ্কীয় যিকোনো অভিযোগ জনাব পাৰিব ৷
ইপিনে, তিনিওটা সমষ্টিৰ ৰাইজে ০৩৬৬২-২৩০০৬৯ , ০৩৬৬২-২৩১১৪৯ আৰু টোল ফ্ৰি ১০৭৭ নম্বৰলৈ ফোন কৰিও অভিযোগ দাখিল কৰিব পাৰিব ৷ দিনে-নিশাই কাৰ্যক্ষম হৈ থাকিবলগীয়া এই অভিযোগ নিয়ন্ত্ৰণ কেন্দ্ৰলৈ ভোটাৰে নিৰ্বাচন সম্পৰ্কীয় যিকোনো প্ৰশ্নৰ উত্তৰ পাবৰ বাবে আৰু সন্দেহ নিৰাময়ৰ বাবেও ফোন কৰিব পাৰিব ৷ ৰাইজৰ প্ৰশ্ন বা অভিযোগবোৰ প্ৰয়োজনত কল চেন্টাৰৰ পৰা সংশ্লিষ্ট নিৰ্বাচন কোষ বা বিভাগলৈ প্ৰেৰণ কৰি সমাধানৰ ব্যৱস্থা কৰা হ’ব ৷
সকলো ৰাইজকে এই সুবিধা গ্ৰহণ কৰি এক স্বচ্ছ আৰু নিকা নিৰ্বাচন অনু্ষ্ঠিত কৰাত সহযোগ কৰিবলৈ জিলা নিৰ্বাচন বিষয়াই আহ্বান জনায় ৷
