নেছনেল হেল্থ অথৰিটিৰ মুখ্য কাৰ্যবাহী বিষয়া আৰএছ শৰ্মাই আজি জনায় যে, ২৪ এপ্ৰিলৰ পৰা ১৮ বছৰৰ ঊৰ্ধ্বসকলক টিকাকৰণৰ বাবে নাম নথিভুক্তকৰণ আৰম্ভ হ’ব । কেন্দ্ৰীয় চৰকাৰৰ ‘ক’উইন’ এপ্ বা প’ৰ্কেলৰ জৰিয়তে নাম নথিভুক্ত কৰিব পাৰিব ।
শৰ্মাই কয়, ‘১৮ বছৰৰ ঊৰ্ধ্বৰ সকলোৱে নাম নথিভুক্ত কৰিব পাৰিব ক’উইন এপ্লিকেচনৰ জৰিয়তে । ২৪ এপ্ৰিলৰ পৰা আৰম্ভ হ’ব এই নথিভুক্তকৰণ । টিকাকৰণ প্ৰক্ৰিয়া আৰু প্ৰতিষেধক গ্ৰহণৰ বাবে প্ৰয়োজনীয় নথিপত্ৰ একেই থাকিব ।’
সোমবাৰে কেন্দ্ৰীয় চৰকাৰে কৰা ঘোষণা অনুযায়ী, ১৮ বছৰৰ অনুৰ্ধ্বসকলে প্ৰতিষেধক গ্ৰহণ কৰিব নোৱাৰিব । ১৬ জানুৱাৰীত আৰম্ভ হোৱা টিকাকৰণৰ প্ৰথম পৰ্যায়ত প্ৰতিষেধক লাভ কৰিছিল স্বাস্থ্যকৰ্মী আৰু প্ৰথম শাৰীৰ ক’ভিড যোদ্ধাসকলে । দ্বিতীয় পৰ্যায়ত ৪৫ বছৰৰ ঊৰ্ধ্বৰসকলে প্ৰতিষেধক লাভ কৰিছিল । এক মে’ৰ পৰা তৃতীয় পৰ্যায়ৰ টিকাকৰণত ১৮ বছৰ বয়সৰ ঊৰ্ধ্বৰ সকলক প্ৰতিষেধক প্ৰদান কৰা হ’ব । চৰকাৰী চিকিৎসালয়সমূহত বিনামূল্যে প্ৰতিষেধক প্ৰদান কৰা হ’ব । কিন্তু বেচৰকাৰী চিকিৎসালয়ত আৰু অন্য প্ৰতিষেধক কেন্দ্ৰত প্ৰতিষেধক গ্ৰহণ কৰিবৰ বাবে ব্যয় কৰিব লাগিব নিজৰ ধন ।
শৰ্মাই কয়, ‘বেচৰকাৰী সংস্থাবোৰক ক’উইন এপত টিকাকৰণৰ দিন আৰু সময় জনাবলৈ নিৰ্দেশ দিয়া হৈছে । লগতে বেচৰকাৰী সংস্থাৰ কৰ্মচাৰীসকলৰ ফোন নম্বৰো ক’উইন এপত প্ৰকাশ কৰিবলৈ নিৰ্দেশ দিয়া হৈছে ।’
টিকাকৰণৰ পাছত প্ৰতিষেধকৰ কোনো প্ৰভাৱ পৰিছে নে নাই তাৰ প্ৰতিও লক্ষ্য ৰখা হ’ব বুলি জনায় শৰ্মাই ।
