কলগাছিয়াৰ একাংশ খেতিয়কে এবুকু আশা লৈ কৰিছিল তিতা কেৰেলাৰ লগতে বিভিন্ন পাচলি খেতি । অধিকাংশ কৃষকেই টকা সুদত বা বন্ধন বেংকৰ পৰা ঋণ লৈ, কোনোবাই আকৌ বীজ ভাণ্ডাৰৰ দোকানত বাকী ৰাখি পাচলিৰ খেতি কৰিছে । আশা আছিল উৎপাদিত শাক-পাচলি বিক্ৰী কৰি ঋণ-ধাৰ মাৰিব আৰু নিজৰ পৰিয়ালটোক ভালকৈ পোহপাল দিব । কিন্তু সেই আশাত পৰিল চেচাপানী।
এনে এক মূহুৰ্তত বহুতো কৃষকৰ বিননি শুনা গ’ল বৰপেটা জিলাৰ কলগাছিয়াৰ আমগুৰিত। বিঘাই প্ৰতি ৩৫-৪০ হেজাৰ টকা খৰচ কৰি তিতা কেৰেলা খেতি কৰিছিল খেতিয়কে। কিন্তু পৰিতাপৰ বিষয় উৎপাদন ভাল হোৱা স্বত্তেও মিনি তলাবন্ধ চলি থকাত বিক্ৰী কৰিব পৰা নাই তিতা কেৰেলাকে ধৰি বিভিন্ন পাচলি । ফলত খেতিতেই গেলিব ধৰিছে তিতা কেৰেলাবোৰ।
ইপিনে, ঋণৰ বোজা, আনফালে পৰিয়ালটো পোহপাল দিয়াৰ চিন্তাত মূৰে কপালে হাত দিছে হতাশাগ্ৰস্ত খেতিয়কে । তলাবন্ধৰ ফলত সাপ্তাহিক বজাৰ বন্ধ হৈ পৰাত বিক্ৰী কৰিব পৰা নাই পাঁচলি সমূহ। ফলত বৃহৎ লোকচানৰ সন্মুখীন হৈছে কৃষকসকলে । সেয়ে চৰকাৰে এইসকল ক্ষতিগ্ৰস্ত কৃষকক এক কালীন আৰ্থি কৃষকসকলক সাহাৰ্য প্ৰদানেৰে কৃষকৰ পৰিয়ালসমূহক সকাহ দিবলৈ বিভিন্ন মহলে নতুন চৰকাৰৰ কৃষি বিভাগলৈ দাবী জনাইছে ।
