এল’পেথি চিকিৎসা আৰু এল’পেথি চিকিৎসকসকলক লৈ বিতৰ্কিত মন্তব্য কৰাৰ পাছত তেওঁক গ্ৰেপ্তাৰ কৰাক লৈ প্ৰশাসনক প্ৰত্যাহ্বান জনালে বাবা ৰামদেৱে ।
বৃহস্পতিবাৰে সামাজিক মাধ্যমত শ্বেয়াৰ কৰা এটা ভিডিঅ’ত তেওঁ এই বিষয়ে কয় । ভিডিঅ’টোত তেওঁক অত্যন্ত আত্মবিশ্বাসী দেখা যায় । তেওঁ হাঁহি হাঁহি এক প্ৰকাৰৰ প্ৰত্যাহ্বান জনায় ।
পোনপটীয়াকৈ নক’লেও তেওঁ ভিডিঅ’টোত কেন্দ্ৰকে উদ্দেশ্যি কয়, ‘স্বামী ৰাম দেৱক তেওঁৰ পিতৃয়েও গ্ৰেপ্তাৰ কৰিব নোৱাৰিব । তেওঁলোকে সামাজিক মাধ্যমত ‘ঠগ ৰামদেৱ’ ‘মহাঠগ ৰামদেৱ’ ‘গ্ৰেপ্তাৰ ৰামদেৱ’ ট্ৰেণ্ড আৰম্ভ কৰিছে । তেওঁলোকে কৰি থাকক । আমাৰ মানুহে এই সকলোবোৰ দেখি অভ্যস্ত ।’
এল’পেথি চিকিৎসা আৰু এল’পেথি চিকিৎসকসকলক লৈ বিতৰ্কিত মন্তব্য কৰাৰ পাছতে সামাজিক মাধ্যমত ‘#এৰেষ্টৰামদেৱ’ ট্ৰেণ্ড আৰম্ভ হৈ পৰে । এই ট্ৰেণ্ডৰ পৰিপ্ৰেক্ষিততে এই মন্তব্য কৰে ৰামদেৱে ।
সদ্যহতে ভাইৰেল হোৱা এটা ভিডিঅ’ত তেওঁক কৈছিল, ‘চিকিৎসা বা অক্সিজেনৰ অভাৱত যিমান মানুহ মৰিছে, তাতোকৈ বেছি মানুহ এল’পেথি ঔষধ খাই মৰিছে । এল’পেথি এটা দেউলীয়া হোৱা বিজ্ঞান ।’
Ramdev challenges Modi Govt into arresting him, says "UNKA BAAP BHI ARREST NAHI KAR SAKTA"
Over to you, @narendramodi @AmitShah !!
— Gaurav Pandhi (@GauravPandhi) May 25, 2021
কৰ’না পৰিস্থিতিত এই ভিডিঅ’ ভাইৰেল হোৱাৰ পাছত প্ৰবল সমালোচনা আৰম্ভ হয় । ইণ্ডিয়ান মেডিকেল এছোছিয়েছনে ৰামদেৱক আইনী জাননী প্ৰেৰণ কৰে । পাছত ৰামদেৱৰ পতঞ্জলি সংস্থাৰ এক বিবৃতিত কোৱা হয়, ৰামদেৱে সেই অনুষ্ঠানত হোৱাটছএপৰ এটা মেচেজ পঢ়িছিল । ভিডিঅ’টো ইডিত কৰি তাৰ প্ৰসংগ বাদ দি ভাইৰেল কৰা হৈছে ।
এল’পেথি ঔষধধক লৈ কৰা মন্তব্যৰ বাবে ৰামদেৱক পূৰ্বেই এহেজাৰ কোটি টকাৰ মানহানিৰ গোচৰৰ জাননী পঠাইছে আইএমএ । যোগগুৰুৰ বিৰুদ্ধে দেশদ্ৰোহৰ গোচৰ ৰুজু কৰিবৰ বাবে প্ৰধানমন্ত্ৰী নৰেন্দ্ৰ মোদীক পত্ৰও প্ৰেৰণ কৰে আইএমএ ।