মহামাৰী কৰ’না ভাইৰাছে দ্বিতীয় বাৰৰ বাবে যিধৰণৰ সংহাৰি ৰূপ ধাৰণ কৰিছে তাৰ ফলত অসমৰ বিভিন্ন জিলাত বহু লোক সংক্ৰমিত হোৱাৰ লগতে মৃত্যু হৈছে । ইতিমধ্যে কোকৰাঝাৰ জিলাৰ অন্তৰ্গত দোতমা অঞ্চলতো কৰ’নাই ভয়াবহ ৰূপ লৈছে ।
দোতমাত বহু সংখ্যক লোক আক্রান্ত হোৱাৰ লগতে কে’বাজনৰো মৃত্যু হৈছে । দোতমাত আজি মুঠ ৫৫ জন ৰোগীৰ ক’ভিড পৰীক্ষা কৰা হয় তাৰে ১১ জনৰ শৰীৰত ভাইৰাছৰ উপস্থিতি ধৰা পৰে ।
কালি দোতমা অঞ্চলৰ এজন ব্যাৱসায়ী ৰাকেশ সাহা(৪৭) ক’ভিডত আক্রান্ত হৈ মৃত্যু হয় । বিগত ১৫ দিনত দোতমা অঞ্চলত মুঠ ১০৬ জন লোক ক’ভিড-১৯ত আক্ৰান্ত হয়, ফলত অঞ্চলটোত আতংকময় পৰিৱেশৰ সৃষ্টি হয় ।
দোতমা বজাৰখনতে বিগত দিনত তিনিজন লোকৰ দেহত ক’ভিড ভাইৰাছৰ উপস্থিতি ধৰা পৰাৰ লগতে কালি এজন লোকৰ মৃত্যু হয় । সেয়ে বজাৰখনক কন্টেইনমেণ্ট জ’ন হিচাপে ঘোষণা কৰিবলৈ দোতমাৰ সমাজ সচেতন নাগৰিকে জিলা প্ৰশাসনক আহ্বান জনায় ।
দোতমা স্বাস্থ্য কেন্দ্রৰ উপ অধীক্ষক ডক্টৰ বলোৰাম বৰ্মনে দোতমা অঞ্চলৰ ৰাইজক ক’ভিডৰ ভয়াবহতাৰ প্ৰতি লক্ষ্য ৰাখি চৰকাৰে বান্ধি দিয়া ক’ভিডৰ নীতি নিয়ম মানি চলিবলৈ আহ্বান জনায় । লগতে সামাজিক দূৰত্ব অটুট ৰখা, মাক্স পৰিধান কৰা, ছেনিটাইজাৰ ব্যৱহাৰ কৰিবলৈ কয় আৰু অনাহকত বাহিৰলৈ ওলাই নাহিবলৈ ৰাইজক আহ্বান জনায় ।
