ক’ভিড পৰিস্থিতিৰ মাজতে নতুন সাংসদ ভৱন অৰ্থাৎ চেণ্ট্ৰেল ভিস্তা প্ৰকল্পৰ কাম আৰম্ভ হোৱাক লৈ সমালোচনাৰ সৃষ্টি হৈছিল । কিন্তু এই প্ৰকল্পৰ কাম অব্যাহত ৰাখিবৰ বাবে ক’লে দিল্লী উচ্চ ন্যায়ালয়ে । দিল্লীৰ উচ্চ ন্যায়ালয়ে জনায়, ‘চেণ্ট্ৰেল ভিস্তা অপৰিহাৰ্য প্ৰকল্প’ ইয়াক স্থগিত ৰাখিব নোৱাৰি ।
এই প্ৰকল্পৰ বিৰুদ্ধে দাখিল কৰা এক গোচৰৰ পৰিপ্ৰেক্ষিতত এই শুনানি দিছিল ন্যায়াধীশসকলে । লগতে গোচৰ ৰুজু কৰোতাৰ বিৰুদ্ধে জৰিমনাও বিহা হৈছে ।
সোমবাৰে দিল্লী উচ্চ ন্যায়ালয়ৰ প্ৰধান ন্যায়াধীশ ডিএন পেটেল আৰু ন্যায়াধীশ জ্যোতি সিঙৰ ডিভিছন বেঞ্চত উত্থাপন কৰা হৈছিল গোচৰতো । ইয়াৰ পৰিপ্ৰেক্ষিতত ন্যায়ালয়ে জনায় যে, অতিমাৰী পৰিস্থিতিত চেণ্ট্ৰেল ভিস্তা প্ৰকল্পৰ কাম বন্ধ কৰাৰ কোনো প্ৰশ্নই নোঠে । ন্যায়ালয়ে জনায় যে, চুক্তি অনুযায়ী, নৱেম্বৰৰ ভিতৰতে প্ৰকল্পৰ কাম শেষ কৰাৰ কথা ঠিকাদাৰ সংস্থা পালোনজিৰ, সেয়ে প্ৰকল্পৰ কাম চলি থাকিব ।
ন্যায়ালয়ে এই প্ৰকল্পত স্থগিতাদেশ দিবৰ বাবে প্ৰস্তুত নহয় । এই আবেদন ‘উদ্দেশ্যপ্ৰণোদিত’ বুলিও মন্তব্য কৰিছে ন্যায়াধীশসকলে । গোচৰ দাখিলকাৰীৰ বিৰুদ্ধে এক লাখ টকাৰ জৰিমনা বিহিছে দিল্লী ন্যায়ালয়ৰ ডিভিছন বেঞ্চে ।
