কৰ’নাৰ টিকাকৰণত উৎসাহিত কৰিবৰ বাবে আমেৰিকাৰ কোনো ৰাজ্যত বিনামূলীয়া গাঞ্জা, মদৰ ওপৰত অনুমোদন দিয়াৰ সময়তে ক’ৰবাত আকৌ চিনেমাৰ টিকট, লটাৰীৰ ব্যৱস্থাও কৰা হৈছে । ক’ভিড টিকাকৰণত জনসাধাৰণক উৎসাহিত কৰিবৰ বাবে ভাৰততো এনে পদক্ষেপ গ্ৰহণ কৰিলে ইউক’ বেংকে । ক’ভিড প্ৰতিষেধক গ্ৰহণ কৰা লোকসকলক স্থায়ী জমাৰাশি (ফিক্সড্ ডিপ’জিত)ত অধিক সুদ দিয়াৰ কথা জনাইছে তেওঁলোকে ।
এক বিবৃতিত ইউক’ বেংকৰ তৰফৰ পৰা জনোৱা হৈছে, ‘সাধাৰণ জনতাক টিকাকৰণৰ বাবে উৎসাহিত কৰিবলৈ এই ক্ষুদ্ৰ পদক্ষেপ আমাৰ । ইয়াৰ বাবে আমাৰ নতুন সুযোগ ইউক’ভেক্সি-৯৯৯ জাৰি কৰা হ’ব আগন্তুক ৩০ ছেপ্টেম্বৰ পৰ্যন্ত ।’
ক’ভিড প্ৰতিষেধক গ্ৰহণ কৰাৰ পাছত সেই শংসাপত্ৰ দেখুৱাই ৯৯৯ দিনৰ স্থায়ী জমাৰাশি ৰাখিলে ০.৩০ শতাংশ বেছি সুদ লাভ কৰিব । এই অতিৰিক্ত সুদ লাভ কৰিবৰ বাবে শংসাপত্ৰটো চলিত বৰ্ষৰ ৩০ ছেপ্টেম্বৰৰ ভিতৰৰ হ’ব লাগিব ।
ইউক’ বেংকৰ দৰে একেই সুবিধা দিছে চেণ্ট্ৰেল বেংক অৱ ইণ্ডিয়াই । এই বেংকেও প্ৰতিষেধক গ্ৰহণ কৰা লোকসকলক ০.২৫ শতাংশ অতিৰিক্ত সুদ প্ৰদান কৰিব । প্ৰবীণ নাগৰিকসকলৰ বাবে এই সুদ হ’ব ০.৫০ শতাংশ । অৱশ্যে, এহেজাৰ ১১১ দিনৰ স্থায়ী জমাৰাশিৰ বাবে এই সুবিধা দিয়া হ’ব ।
