সাংবাদিক সুলভ শ্রীবাস্তৱৰ ৰহস্যজনক মৃত্যুৰ ঘটনাত মঙলবাৰে যোগী আদিত্যনাথক পত্ৰ লিখি চিবিআই তদন্তৰ দাবী জনালে কংগ্ৰেছ নেত্ৰী প্ৰিয়ংকা গান্ধীয়ে ।
অবৈধ সুৰা বিক্ৰী কৰা প্ৰতিবেদন দিয়াৰ বাবে মৃত্যুৰ ভাবুকি পাইছিল “এবিপি গঙ্গা’ৰ প্ৰতাপগড় জিলাৰ প্ৰতিনিধি সুলভে । তাৰ পাছত দেওবাৰে নিশা উদ্ধাৰ হয় সুলভৰ মৃতদেহ ।
উত্তৰপ্ৰদেশৰ মুখ্যমন্ত্ৰী যোগীলৈ লিখা এখন হিন্দী পত্ৰত প্ৰিয়ংকাই অভিযোগ কৰে যে, সুৰা মাফিয়া আৰু প্ৰশাসনৰ সম্পৰ্ক ৰাজ্যজুৰি বিয়পি পৰিছে । তেওঁ এই চক্ৰৰ বিৰুদ্ধে কঠোৰ ব্যৱস্থা লোৱাৰ দাবী জনাইছে ।
পত্ৰখনত, প্ৰিয়ংকাই শীঘ্ৰেই সুলভৰ পৰিয়ালৰ ওচৰত আৰ্থিক সাহায্যৰ বাবে আবেদন জনায় ।
১২ জুনত প্ৰয়াগৰাজে জোনৰ এডিজিলৈ লিখিছিল যে সুৰা মাফিয়াসকলৰ অবৈধ ব্যৱসায়ৰ প্ৰতিবেদন দিবলৈ তেওঁৰ ওপৰত দায়িত্ব অৰ্পণ কৰা হৈছে । সেয়ে তেওঁ নিজৰ আৰু তেওঁৰ পৰিয়ালৰ সুৰক্ষাৰ বিষয়ে চিন্তিত ।
প্ৰিয়ংকাই যোগীলৈ লিখা পত্ৰত এই বিষয়টো উল্লেখ কৰিছে । আৰক্ষীক পত্ৰ দিয়াৰ পাছদিনা দেওবাৰে নিশা প্ৰতাপগড়ত সুলভৰ মৃতদেহ উদ্ধাৰ কৰা হয় । মৃতদেহৰ কাষত সাংবাদিকজনৰ মটৰচাইকেলখন পৰি আছিল ।
আৰক্ষীয়ে কয় যে সুলভৰ মটৰচাইকেলে নিয়ন্ত্ৰণ হেৰুৱাই আৰু ৰাস্তাৰ কাষত এটা টিউবৱেলত খুন্দা মাৰে । যাৰ ফলত সুলভ বাইকৰ পৰা ছিটিকি পৰি প্ৰাথমিকভাৱে আঘাত প্রাপ্ত হয় ।
কিন্তু সুলভক ভাবুকি দি আৰু হত্যাৰ অভিযোগত অচিনাক্ত দুৰ্বৃত্তৰ বিৰুদ্ধে এজাহাৰ দাখিল কৰিছে সুলভৰ পত্নীয়ে । আৰক্ষীয়ে সোমবাৰে হত্যাৰ এটা গোচৰ ৰুজু কৰিছিল ।
সুলভৰ ৰহস্যজনক মৃত্যুক লৈ বিৰোধীয়ে যোগী চৰকাৰক লক্ষ্য কৰি লৈছে । আনকি প্ৰতাপগড়ৰ বিজেপি সাংসদ সঙ্গমলাল গুপ্তাইও প্ৰশ্ন কৰিছে । এছপি নেতা অখিলেশ যাদৱে সোমবাৰে গোটেই বিষয়টোৰ উচ্চ পৰ্যায়ৰ তদন্তৰ দাবী জনায় ।