কংগ্ৰেছৰ বিৰুদ্ধে ক’ভিডৰ প্রতিষেধক লৈ বিভ্ৰান্তি বিয়পোৱাৰ অভিযোগ উত্থাপন কৰি বিজেপিয়ে প্ৰশ্ন কৰে যে, গান্ধী পৰিয়ালৰ সদস্যসকলে প্ৰতিষেধক লৈছে নে ? কংগ্ৰেছ নেতৃত্বই আজি স্পষ্টভাৱে জনালে যে, ছোনিয়া গান্ধীয়ে ইতিমধ্যে দুপালি প্ৰতিষেধক গ্ৰহণ কৰিছে ।
প্ৰিয়ংকা গান্ধীয়ে টিকাৰ প্ৰথম পালি গ্ৰহণ কৰিছে । ক’ভিডৰ পৰা আৰোগ্য হোৱাৰ পাছত ৰাহুল গান্ধীয়ে নিৰ্ধাৰিত সময়ত টিকা গ্ৰহণ কৰিব । এই কথা উল্লেখ কৰি কংগ্ৰেছে কয় যে, মোডী চৰকাৰে অপ্ৰয়োজনীয় বিষয়ত চিন্তা নকৰাকৈ সকলোৰে টিকাকৰণত ‘ৰাজধৰ্ম’ অনুসৰণ কৰক ।
কংগ্ৰেছৰ মুখ্য মুখপাত্ৰ ৰণদীপ সিং সুৰজেৱালাই কয়, “অপ্ৰয়োজনীয় বিতৰ্ক সৃষ্টি নকৰি, মোডী চৰকাৰে প্ৰতিদিনে ৮০ লাখৰ পৰা এক কোটি লোকৰ টিকাকৰণৰ ওপৰত গুৰুত্ব দিয়া উচিত। যাতে চলিত বৰ্ষৰ ডিচেম্বৰৰ ভিতৰত এশ কোটি লোকক টিকাকৰণৰ লক্ষ্য প্ৰাপ্তি হয় । ক’ভিডৰ দ্বিতীয় ঢৌৰ বিৰুদ্ধে যুঁজ দিয়াত ব্যৰ্থ হোৱা চৰকাৰৰ বাবে এতিয়া এইটোৱে ৰাজকীয় ধৰ্ম হ’ব লাগে ।”
ৰণদীপে অভিযোগ কৰিছিল যে ১৬ জানুৱাৰীৰ পৰা ১৬ জুনৰ ভিতৰত দেশৰ মাত্ৰ ৩.৫১ শতাংশ লোকক টিকাকৰণ কৰা হৈছে । এইটো বিশ্বৰ সৰ্বনিম্ন টিকাকৰণৰ হাৰ।
