বাগ্সাৰ শালবাৰী মহকুমাৰ অন্তৰ্গত খুচুৰাবাৰীত ভয় ভাবুকিৰে মাটি বেদখল কৰা অভিযুক্তৰ বিৰুদ্ধে অভিযোগকাৰীয়ে থানাত গোচৰ ৰুজু কৰাৰ পাছতো আৰক্ষীয়ে কোনো ধৰণৰ ব্যৱস্থা গ্ৰহণ নকৰাৰ অভিযোগ উত্থাপন হোৱাৰ সমান্তৰালভাৱে মাটি বেদখল কৰা বুলি অভিযোগ উত্থাপন হোৱা অভিযুক্তই এই কাৰ্য অস্বীকাৰ কৰিছে ৷
উল্লেখ্য যে বাগ্সাৰ গোৱৰ্ধনা আৰক্ষী থানাৰ অন্তৰ্গত খুচুৰাবাৰী গাঁৱৰ মৃত আজিমউদ্দিনৰ পুত্ৰ জহৰউদ্দিন আৰু জহৰউদ্দিনৰ ককায়েকৰ নামত থকা খুচুৰাবাৰী গাঁৱৰ ৭২ নং ম্যাদী পাট্টাৰ ৬২, ৬৭ আৰু ৬৮ নম্বৰ দাগৰ মুঠ ২২ বিঘা এক কঠা ন লেছা মাটিৰ প্ৰায় সাত/আঠ বিঘা মাটি একে গাঁৱৰে মৃত নাজিমউদ্দিনৰ পুত্ৰ নুৰ ইছলাম আৰু নুৰ ইছলামৰ পুত্ৰ আজাহাৰ আলীয়ে বলপূৰ্বকভাৱে দখল কৰি লৈ সেই মাটিত শিল-বালি খান্দি থকাৰ উপৰিও বাঁহ গছ, কল গছ আদি ৰোপণ কৰিছে বুলি অভিযোগ উঠিছে ৷
নিজৰ মাটি ডৰালৈ গ’লেই অভিযুক্তই মাৰ-ধৰ কৰিবলৈ খেদি আহে মাটিৰ গৰাকীক ৷ ঘটনা সন্দৰ্ভত গোৱৰ্ধনা আৰক্ষী থানাত কে’বাবাৰো গোচৰ তৰা হৈছিল যদিও আৰক্ষীয়ে এই ক্ষেত্ৰত বিশেষ কোনো ধৰণৰ গুৰুত্ব প্ৰদান নকৰাৰ অভিযোগ উত্থাপন হৈ আহিছে ৷ অভিযোগকাৰীৰ পৰিয়ালে এই সন্দৰ্ভত কয় যে, আজাহাৰ আলীয়ে জোৰ-জভৰদস্তিকৈ মাটি বেদখল কৰি সেই মাটিত বৰ্তমানো শিল-বালি উঠাই আছে ৷ বাধা দিবলৈ গ’লেই দা, কুঠাৰ লৈ মাৰিবলৈ খেদি আহে আজহাৰ আলীৰ লগতে পৰিয়ালৰ লোকে ৷
বাগ্সা জিলা উপায়ুক্ত, আৰক্ষী অধীক্ষককো এই সংক্ৰান্তত লিখিত অভিযোগ দাখিল কৰা হৈছিল আৰু জিলা উপায়ুক্ত, আৰক্ষী অধীক্ষকে বিষয়টো মীমাংসা কৰাৰ বাবে গোৱৰ্ধনা থানাৰ বিষয়াক দ্বায়িত্ব অৰ্পণ কৰিছিল ৷ গোৱৰ্ধনা আৰক্ষীয়ে বিষয়টো সঠিকমতে তদন্ত নকৰাৰ বাবে বৰ্তমানো আজাহাৰে কাম চলাই যাবলৈ সাহস পাইছে ৷ ১৯৬৫ ৰে ম্যাদী পাট্টাৰ মাটি আৰক্ষী আৰু বন বিভাগৰ নিৰ্লিপ্ততাৰ বাবেই আজি আনৰ দখলত পৰি আছে বুলি ক্ষোভ উজাৰে ৷
স্মৰ্তব্য যে প্ৰায় তিনি বছৰ পূৰ্বে মাটি বেদখলৰ এই ঘটনাটোক লৈ দুয়ো পক্ষৰ লোকৰ মাজত প্ৰচণ্ড মাৰ-পিটৰ সৃষ্টিও হৈছিল আৰু ঘটনাটোত বহুকেইজন লোক আহত হৈছিল ৷ ইফালে এই ঘটনাটোৰ অভিযুক্ত আজাহাৰ আলীয়ে সংবাদ মাধ্যমৰ আগত কয়, “প্ৰায় ৩০ বছৰ আগৰ মাটি এইয়া৷ এই মাটি দেউতাৰ মোমায়েকৰ আছিল৷ দেউতাৰ নামত তেওঁ লিখি দিছিল৷ বৰপেটাৰ এজনেও দেউতাৰ নামত লিখি দিছিল প্ৰায় ১১ বিঘা মাটি৷ পেহীয়েও দিছিল তেওঁৰ নামত থকা কিছু মাটি৷ তেওঁলোকে (জহৰউদ্দিন) বেলেগ মাটিৰ দলিল আনি পাট্টা দেখুৱাই থানাত কেছ কৰে ৷ এই মাটি আমাৰ মাটি৷ সেয়ে বাঁহগছ, কলগছ আদি ৰুইছো ইয়াত ৷ মই মণ্ডল আনিলেও তেওঁলোকে নানে৷ তেওঁলোকৰ কথা হ’ল মোৰ কাম বন্ধ হওক৷ তেওঁলোকৰ চলি থাকক৷ মাৰ-ধৰ মই নহয় তেওঁলোকেহে কৰিছে৷ ভণ্টিৰ আঙুলি পৰ্যন্ত কাটি দিছিল জহৰউদ্দিনহঁতে ৷”
অভিযুক্ত আজাহাৰ আলীয়ে কয় যে, কোনেও বেআইনী কাম কৰি খাব নালাগে ৷ আৰক্ষীয়ে তদন্ত কৰক কাৰ মাটি ৷ তেতিয়াহে স্পষ্ট হৈ পৰিব সকলো কথা ৷