যোৱা নিশা ধাৰাষাৰ বৰষুণৰ ফলত কলগাছিয়া খণ্ড প্ৰাথমিক চিকিৎসালয়ত এজাক বৰষুণতে কোঠালীসমূহত একাঠু পানী জমা হোৱাত বন্ধ হৈ পৰিছে সকলো ধৰণৰ চিকিৎসা সেৱাৰ লগতে অন্যান্য কাম-কাজ। ফলত ক’ভিড-১৯ ৰ ভেকচিন ল’বলৈ অহা ব্যক্তিসকলে ভেকচিন নোলোৱাকৈ উভতি যোৱা দেখা গৈছে । ৰোগীসকলৰ মাজত সৃষ্টি হৈছে এক অভাৱনীয় পৰিস্থিতিৰ । বন্ধ হৈ পৰিছে জৰুৰীকালীন ১০৮ সেৱা ।
ইফালে চিকিৎস্যালয়খনৰ আবাসিক কোঠালীসমূহতো সেই একেই পৰিস্থিতি, ভিতৰত পানী সোমোৱাত হাহাকাৰৰ সৃষ্টি হৈছে স্বাস্থ্য কৰ্মীসকলৰ মাজত । এই ক্ষেত্ৰত মহকুমা চিকিৎসা বিষয়াগৰাকীয়ে বৰপেটা জিলা প্ৰশাসন তথা বিভাগীয় কৰ্তৃপক্ষক বাৰম্বাৰ অৱগত কৰিও সুফল নোপোৱাৰ অভিযোগ উঠিছে ।
একমাত্ৰ বৰপেটা জিলা প্ৰশাসনৰ হেমাহিৰ বাবেই এনেকুৱা পৰিস্থিতিৰ সৃষ্টি হৈছে বুলি ৰাইজে জানিবলৈ দিয়াৰ লগতে অচিৰেই নলা নিৰ্মাণ কৰি পানী উলিয়াই দিয়াৰ ব্যৱস্থা কৰি চিকিৎস্যালয়খনৰ কাম-কাজ সুচল কৰিবলৈ জিলা প্ৰশাসন, জনীয়াৰ বিধায়ক আৰু বৰপেটা লোকসভা সমষ্টিৰ সাংসদৰ দৃষ্টি আকৰ্ষণ কৰিছে ।
