উচ্চতম ন্যায়ালয়ৰ ৰায়ত মুখ ঠেকেচা খালে নেপালৰ প্ৰধানমন্ত্ৰী কে পি অলিয়ে । আগন্তুক দুই দিনৰ ভিতৰত নেপালী কংগ্ৰেছৰ সভাপতি ছেৰ বাহাদুৰ দেওবাক প্ৰধানমন্ত্ৰী পদত নিয়োগ কৰাৰ নিৰ্দেশ দিলে শীৰ্ষ ন্যায়ালয়ে । আস্থাভোটত পৰাজিত হৈ সংসদৰ নিম্নকক্ষত সংখ্যাগৰিষ্ঠতা হেৰুৱাইছিল অলি চৰকাৰে । সোমবাৰে ভাঙি দিয়া সংসদৰ নিম্নকক্ষৰ পুনৰ্বাহালৰ নিৰ্দেশ দিলে ন্যায়ালয়ে ।
আস্থাভোটৰ পাছত যোৱা ২২ মে’ত প্ৰধানমন্ত্ৰীৰ নিৰ্দেশমৰ্মে সংসদৰ ২৭৫ সদস্যৰ নিম্নকক্ষ ভংগ কৰে নেপালৰ ৰাষ্ট্ৰপতি বিদ্যাদেৱী ভাণ্ডাৰীয়ে । লগতে আগন্তুক ১২ আৰু ১৯ নৱেম্বৰ অন্তৰ্বৰ্তী নিৰ্বাচনৰ দিন ঘোষণা কৰিছিল তেওঁ । ৰাষ্ট্ৰপতিৰ এই সিদ্ধান্তৰ বিৰুদ্ধে শীৰ্ষ ন্যায়ালয়ত ৩০টা হলফনামা দাখিল কৰা হয় । ইয়াৰ ভিতৰত এটা হলফনামা দাখিল কৰিছিল নেপালী কংগ্ৰেছৰ নেতৃত্বাধীন বিৰোধী জোঁটে ।