সৰুপথাৰ বিধান সভা সমষ্টিত নিৰ্মাণ কৰা হ’ব লাভলীনা বৰগোঁহাই ৰাষ্ট্ৰীয় পৰ্যায়ৰ ক্ৰীড়া প্ৰকল্প । মুখ্য মন্ত্ৰী ড° হিমন্ত বিশ্ব শৰ্মাৰ লগত আলোচনা কৰি এই কথা ঘোষণা কৰিছে সৰুপথাৰ সমষ্টিৰ বিধায়ক বিশ্বজিৎ ফুকনে ।
এই ক্ষেত্ৰত সমষ্টিটোৰ জন-প্ৰতিনিধিজনে বিশেষ পদক্ষেপ গ্ৰহণ কৰিছে । উক্ত প্ৰকল্পৰ বাবে নাহৰবাৰীৰ ৪০ বিঘা মাটি ইতিমধ্যে পৰিদৰ্শন কৰি প্ৰাৰম্ভিক প্ৰস্তুতি আৰম্ভ কৰিছে ।
দৈনিক অগ্ৰদূতৰ আগত আজি বিধায়ক বিশ্বজিৎ ফুকনে এই কথা প্ৰকাশ কৰি কয় যে, লাভলীনাই গাঁৱৰ বোকা-পানী খচকি ঘাট-প্ৰতিঘাটৰ মাজেৰে নিজস্ব ব্যক্তিগত প্ৰচেষ্টাৰে সমগ্ৰ বিশ্বৰ সমূখত ভাৰতৰ নাম,অসমৰ নাম উজলাবলৈ সক্ষম হৈছে ।
কিন্তু সৰ্ব দিশতে বিধ্বস্ত সৰুপথাৰ সমষ্টিত ক্ৰীড়াৰ কোনো আন্তঃগাঠনিয়েই নাই । নৱ-প্ৰজন্মক ক্ৰীড়াৰ প্ৰতি আকৰ্ষিত কৰি সৰুপথাৰত ক্ৰীড়াৰ পৰিৱেশ সৃষ্টিৰ বাবে আগন্তুক দিনত বিশেষ উদ্যোগ কৰা হ’ব আৰু লাভলীনাক উক্ত ক্ৰীড়া প্ৰকল্প উপহাৰ হিচাপে দিয়াৰ আন্তৰিক পদক্ষেপ গ্ৰহণ কৰা হৈছে ।
উল্লেখ্য যে ,টকিঅ’ অলিম্পিকত উজলি উঠি সমগ্ৰ ভাৰতবৰ্ষ তথা অসমলৈ গৌৰৱ কঢ়িয়াই অনা লাভলীনাৰ বৰপথাৰ বাৰমুখীয়া গাঁৱৰ ঘৰলৈ পথচোৱাৰ এক বিধ্বস্ত ৰূপ ।
বোকাময় পথচোৱা উন্নয়নৰ বাবে বিগত দিন সমূহত আবেদন-নিবেদন কৰি পোৱা নাছিল সুফল । তদানীন্তধ উপায়ুক্ত বিভাস চন্দ্ৰ মোদিয়ে উক্ত পথ নিৰ্মাণৰ কথা দিওঁ কথা নাৰাখিলে বুলি লাভলীনাৰ পিতৃ তীকেন বৰগোঁহায়ে ক্ষোভেৰে প্ৰকাশ কৰে ।
বৰ্তমান বিধায়ক বিশ্বজিৎ ফুকনৰ উদ্যোগত যুদ্ধকালিনভাৱে নিৰ্মাণ অব্যাহত আছে বাৰমুখীয়া গাঁৱৰ জীয়াৰী লাভলীনাৰ ঘৰলৈ যোৱা বোকাময় পথচোৱা । অতি কম সময়ৰ ভিতৰতে উক্ত পথৰ পকীকৰণৰ কাম সম্পূৰ্ণ হৈ উঠিব বুলি বিধায়ক ফুকনে প্ৰকাশ কৰে ।
