সম্ভাৱনীয় কৰ’নাৰ তৃতীয় ঢৌৰ উদ্বেগৰ বিষয়ে জনালে অল ইণ্ডিয়া ইনষ্টিটিউট অৱ মেডিকেল ছায়েন্স (এইমছ)ৰং প্ৰধান ৰণদীপ গুলেৰিয়াই । তেওঁ কয়, দেশত কৰ’নাৰ ‘আৰ ভেলু’ বৃদ্ধি পাইছে । এনে পৰিস্থিতিত টিকাকৰণেই একমাত্ৰ ভৰসা বুলিও তেওঁ কয় ।
সৰ্ব্বভাৰতীয় সংবাদ মাধ্যমৰ স’তে হোৱা এক সাক্ষাৎকাৰত গুলেৰিয়াই কয়, ‘কৰ’নাৰ আৰ ভেলু .৯৬ ৰ পৰা বৃদ্ধি হৈ এক হৈছে । এইটো চিন্তনীয় বিষয় । অৰ্থাৎ এজনৰ পৰা আনজন আক্ৰান্ত হোৱাৰ শংকা বাঢ়ি যায় । যি অঞ্চলত সংক্ৰমণ বৃদ্ধি পাইছে সেই অঞ্চলত নমুনা পৰীক্ষণ, সংক্ৰমণৰ উৎস সন্ধান আৰু চিকিৎসাৰ ব্যৱস্থা কৰিব লাগিব ।’
সম্প্ৰতি ভাৰতত সংক্ৰমণ বৃদ্ধি পোৱাৰ মূল কাৰণ হৈছে কৰ’নাৰ ডেল্টা ৰূপ । ডেল্টা ৰূপৰ ফলতে ভাৰতত তৃতীয় তৰংগ আহিব পাৰে বুলি শংকা কৰিছে বিশেষজ্ঞসকলে । এই প্ৰসংগত গুলেৰিয়াই কয়, ‘সৰু আই বা মাজু আইৰ আৰ ভেলু প্ৰায় আঠ । অৰ্থাৎ এজনৰ পৰা আঠজনৰ শৰীৰত সংক্ৰমণ হোৱাৰ সম্ভাৱনা থাকে । আমি দ্বিতীয় তৰংগত এজনৰ পৰা সম্পূৰ্ণ পৰিয়ালটোকে আক্ৰান্ত হোৱা দেখিছো । মাজু আইৰ ক্ষেত্ৰতো একেই হয় । ডেল্টা ৰূপত এজন আক্ৰান্ত হ’লে সম্পূৰ্ণ পৰিয়ালটোকে সংক্ৰমিত কৰাৰ ক্ষমতা আছে ।’
ভাৰতৰ বহু কেইখন ৰাজ্যত ছেৰ’ ছাৰ্ভেত পোৱা গৈছে যে এণ্টিবডীৰ পৰিমাণ বৃদ্ধি হৈছে । কিন্তু ইয়াক লৈ অধিক উৎফুল্লিত হৈ হ’ব নালাগে বুলিয়ে কয় গুলেৰিয়াই । তেওঁ কয়, ‘আমি দেখিছো যে কেৰালাত প্ৰথমে এণ্টিবডী বহু বেছি আছিল । কিন্তু সম্প্ৰতি ৰাজ্যখনত সংক্ৰমণ বৃদ্ধি পাইছে । কাৰণ, এটা সময়ৰ পাছত শৰীৰ এণ্টিবডীৰ পৰিমাণ আৰু ক্ষমতা দুটাই কমি আহে । ফলত প্ৰতিষেধকেই একমাত্ৰ ভৰসা । যথা সম্ভৱ সকলোকে দ্ৰুত প্ৰতিষেধক প্ৰদান কৰিব লাগে ।’ তেতিয়াহে ভাৰতত সংক্ৰমণ হ্ৰাস পাব বুলি মত প্ৰকাশ কৰে এইমছৰ প্ৰধানগৰাকীয়ে ।