শালবাৰী মহকুমা আৰক্ষী বিষয়া সমীৰণ বৈশ্যৰ নেতৃত্বত তথা শিমলা, গোৱৰ্দ্ধনা, বাঁহবাৰীৰ আৰক্ষী বিষয়াৰ সহযোগত চলোৱা অভিযানত অস্ত্ৰসহ গ্ৰেপ্তাৰ হৈছে দুজন ডকাইত৷
ধৃত ডকাইত দুজন বিজিত বড়ো আৰু সমৰ সিং নাৰ্জাৰী ৷ ডকাইত দুজনৰ পৰা এটা ৭.৬৫ এম এম পিষ্টল, ছয়টা সজীৱ গুলী, এখন ডেগাৰ আৰু লগতে নগদ ৪১হেজাৰ টকা জব্দ কৰা হৈছে৷
উল্লেখযোগ্য যে কালি বাঁহবাৰীৰ সমীপৱৰ্তী কুঠৰীঝাৰত ষ্টেট বেংকৰ এজন গ্ৰাহকক সুৰক্ষা কেন্দ্ৰত দিন দুপৰতে পিষ্টল দেখুৱাই ডকাইতে লুটি নিছিল চাৰি লাখকৈ টকা ৷
ইয়াৰ পাছতে আৰক্ষীয়ে কৰায়ত্ত কৰিছিল বিজিত বড়ো নামৰ ডকাইতজনক ৷ পৰৱৰ্তী সময়ত উক্ত ডকাইতজনৰ স্বীকাৰোক্তিৰ ভিত্তিত আৰক্ষীয়ে অভিযান চলাই মানাহৰ জংঘলৰ সমীপৰ পৰা সমৰ সিং নাৰ্জাৰী নামৰ আনজন ডকাইতক গ্ৰেপ্তাৰ কৰে ৷
আনহাতে আন এজন পলাতক ডকাইতৰ সন্ধানত আৰক্ষীৰ অভিযান অব্যাহত আছে ৷ উল্লেখযোগ্য যে আজি বাঁহবাৰীত আয়োজিত এখন সংবাদমেলৰ জৰিয়তে এই সকলো কথা সদৰি কৰে শালবাৰী মহকুমা আৰক্ষী বিষয়া সমীৰণ বৈশ্যই৷
