দেশজুৰি বিদ্যালয়, মহাবিদ্যালয় খোলাৰ আবেদন জনাই এইবাৰ কেন্দ্ৰ আৰু ৰাজ্যক পত্ৰ দিলে মনোচিকিৎসকৰ সংগঠন ‘ইণ্ডিয়ান ছাইকিয়াট্ৰিক ছোচাইটী’য়ে । অতিমাৰী পৰিস্থিতিত সুদীৰ্ঘ এবছৰৰো বেছি সময় ধৰি বিদ্যালয়, মহাবিদ্যালয়ৰ পাঠদান বন্ধ হৈ থকাৰ বাবে মানসিকভাৱে অবসাদগ্ৰস্ত হৈ পৰিছে শিক্ষাৰ্থীসকল, মূলতঃ বিদ্যালয়ৰ কমবয়সীয়া ছাত্ৰ-ছাত্ৰীসকল ।
প্ৰি প্ৰাইমাৰীৰ শিশুসকলৰ বাবে সপ্তাহত দুদিন, প্ৰথম শ্ৰেণীৰ পৰা অষ্টম শ্ৰেণী শিক্ষাৰ্থীসকলৰ বাবে তিনি দিন আৰু নৱম আৰু দশম শ্ৰেণীৰ ছাত্ৰ-ছাত্ৰীসকলৰ বাবে সপ্তাহত পাঁচ দিন (সোমবাৰৰ পৰা শুকুৰবাৰ) খুলিব পাৰে । কেন্দ্ৰীয় মহিলা আৰু শিশুকল্যাণ মন্ত্ৰী স্মৃতি ইৰাণী, কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধান, কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰক মনসুখ মাণ্ডব্যক পত্ৰ দি এই পৰামৰ্শ দিয়ে বিশেষজ্ঞসকলৰ সংগঠনে ।
ক’ভিডৰ দ্বিতীয় ঢৌ স্তিমিত হ’লেও সমগ্ৰ দেশতে তৃতীয় ঢৌৰ শংকা বৃদ্ধি পাইছে । এনে পৰিস্থিতিত ক’ভিড বিধি মানি, সকলো সতৰ্কতা অৱলম্বন কৰি কেনেদৰে বিদ্যালয়, মহাবিদ্যালয়, খুলিব পাৰি সেই বিষয়ে কিছু পৰামৰ্শ দিয়া হয় পত্ৰখনত ।
বিশেষজ্ঞ মহলৰ পৰামৰ্শ, ৫০ শতাংশ ছাত্ৰ-ছাত্ৰীৰে পাঠদান কৰিব পাৰি । যিসকলৰ ৰোল নম্বৰ জোৰ সংখ্যা তেওঁলোক এদিন বিদ্যালয়লৈ আহিব । বাকী থকা সকলে অনলাইনত ক্লাছ কৰিব । বিজোৰ সংখ্যাৰ ৰোল নম্বৰৰ শিক্ষাৰ্থীসকলে বিদ্যালয়লৈ আহি ক্লাছ কৰিব । যিসকলে বিদ্যালয়লৈ আহিব নোৱাৰিব তেওঁলোকৰ বাবে অনলাইন ক্লাছৰ ব্যৱস্থা কৰাৰ পৰামৰ্শ দিছে বিশেষজ্ঞসকলে ।
বিদ্যালয়, মহাবিদ্যালয় খুলিলে ছাত্ৰ-ছাত্ৰী আৰু কৰ্মচাৰীসকলৰ নিয়মীয়াকৈ শৰীৰৰ তাপমাত্ৰা জোখা প্ৰয়োজন । কোনো শিক্ষাৰ্থী বা কৰ্মচাৰীৰ শৰীৰত উপসৰ্গ দেখা গ’লে ক’ভিড পৰীক্ষণৰ বাবে ৰেপিড এণ্টিজেন টেষ্ট কিট ৰাখিব লাগিব । ক’ভিড উপসৰ্গ চিহ্নিতকৰণৰ বাবেও কৰ্মীসকলক প্ৰশিক্ষণ দিয়া প্ৰয়োজনীয় । শ্ৰেণী কোঠাৰ দুৱাৰ, খিৰিকী খোলা ৰখাৰ লগতে চেয়াৰ, টেবল ডেস্ক-বেঞ্চসহ অন্যান্য সামগ্ৰীসমূহ সঘনাই ছেনিটাইজ কৰাৰ পৰামৰ্শ দিয়া হৈছে পত্ৰখনত ।
পত্ৰত বিশেষজ্ঞসকলে জনাইছে, অতিমাৰী পৰিস্থিতিত অনলাইনত পঢ়া-শুনা, খেলা-ধোলাৰ বাবে শিশুসকলৰ শৰীৰ আৰু মনত প্ৰভাৱ পৰিছে । একেৰাহে ম’বাইল বা কম্পিউটাৰ ক্ৰীনত চাই থকাৰ বাবে বহুতৰে চকুৰ সমস্যাও দেখা গৈছে । বহুতৰে মূৰৰ বিষো হোৱা দেখা গৈছে ।
বাহিৰত নোলোৱাৰ বাবে বহু শিশুৰ শৰীৰত ভিটামিন ডি-ৰ অভাৱ লক্ষণীয় । ম’বাইলত গেম খেলা বা পৰ্ন ছবিত আসক্ত হোৱাৰ প্ৰবণতা বৃদ্ধি পাইছে শিশুসকলৰ মাজত । এই বিষয়সমূহৰ প্ৰতি লক্ষ্য ৰাখি বিদ্যালয় পাঠদানৰ উপৰিও পাঠ্যক্ৰম বহিৰ্ভুত কাৰ্যক্ৰমৰ আয়োজন কৰাৰ কথা কোৱা হৈছে পত্ৰত । লগতে শিক্ষাৰ্থীসকলৰ মানসিক স্বাস্থ্যৰ বাবে মাজে মাজে যাতে কাউন্সিলিং কৰা হয়, তাৰো পৰামৰ্শ দিয়া হৈছে ।
