বন বিভাগৰ দায়িত্বজ্ঞানহীনতাৰ বাবে বিগত এসপ্তাহ ধৰি শয্যাগত অৱস্থাত আছে বাগসাৰ শালবাৰীৰ খাগ্ৰাবাৰীৰ খায়েৰ উদ্দিন নামৰ এজন যুৱক ৷ পৰিয়ালৰ লোকে যুৱকজনক কে’বাখনো চিকিৎসালয়ত চিকিৎসা প্ৰদান কৰিছে যদিও উন্নত চিকিৎসাৰ বাবে অন্য চিকিৎসালয়ত ভৰ্ত্তি হোৱাৰ পৰামৰ্শ দিছে । কিন্তু পৰিয়ালৰ মূল উপাৰ্জনকাৰী শয্যাশায়ী হৈ পৰাত অৰ্থৰ অভাৱত বিমোৰত পৰিছে পৰিয়ালটোৱে ৷
উল্লেখ্য যে খায়েৰ উদ্দিনে শহুৰৰ ঘৰৰ পৰা আহি থকা অৱস্থাত বৰপেটা ৰোডৰ বন বিভাগৰ কাৰ্যালয়ৰ কাষতে থকা এডাল প্ৰকাণ্ড মৰা গছ বাগৰি গুৰুত্বৰভাৱে আহত হয় ৷ পৰিয়ালৰ অভিযোগ অনুসৰি উক্ত গছজোপা মৰি যোৱাৰ পাছতো কোনো ধৰণৰ ৱ্যৱস্থা গ্ৰহণ কৰা নাছিল বন বিভাগে ৷ যাৰ বাবেই খায়েৰ উদ্দিনে আজি শয্যাগত হৈ থাকিব লগা হৈছে ৷
ইতিমধ্যে পৰিয়ালৰ লোকে বৰপেটা জিলা উপায়ুক্ত তথা বন বিভাগক অভিযোগ দাখিল কৰাৰ পাছতো কোনো গুৰুত্ব প্ৰদান কৰা নাই । এতিয়া পৰিয়ালটোলৈ নামি আহিছে ঘোৰ অমানিশা ৷ মহামাৰী ক’ভিড-১৯ৰ বাবে চৰকাৰে দিয়া তলাবন্ধৰ ফলত পৰিয়ালটোৰ পানীত হাঁহ নচৰা অৱস্থা হৈছে ।
এফালে চিকিৎসাৰ চিন্তা আনফালে দুবেলা দুমুঠিৰ চিন্তা ৷ পৰিয়ালটোৱে ঘটনাৰ উচিত তদন্ত কৰি চিকিৎসাৰ ব্যৱস্থা কৰাৰ বাবে চৰকাৰক আহ্বান জনোৱাৰ লগতে IFSC SBIN0015078 একাউণ্ট নম্বৰ 35957531820ত কিছু আৰ্থিক সহায় আগবঢ়াবলৈ সদাশয় ৰাইজক আহ্বান জনাইছে ৷