হাউলীৰ মৌটুপুৰিৰ ৩১ নং ৰাষ্ট্ৰীয় ঘাইপথত আজি পুৱা এক শোকাৱহ পথ দুৰ্ঘটনা সংঘটিত হয় । দুৰ্ঘটনাটোত এজনী ন বছৰীয়া কণমানি নিহত হোৱাৰ লগতে তিনিজন গুৰুতৰভাৱে আহত হয় । নিহত শিশুটি তামুলপুৰৰ নাৰগিচ খাতুন আৰু আহত তিনিজন হৈছে ক্ৰমে হাউলীৰ মুকলেশ মল্লিক, হাজেৰা খাটুন আৰু মজ্জেন মল্লিক ।
তথ্য অনুসৰি, মৃত নাৰগিচ খাতুনে তামুলপুৰৰ পৰা পৰিয়ালৰ স’তে হাউলীত থকা ককাকৰ ঘৰলৈ বিয়া খাবলৈ আহিছিল ৷ আজি পুৱা ঘৰলৈ যাবৰ বাবে এখন গাড়ীৰে চাৰিওজনে বৰপেটাৰোডৰ ৰেল ষ্টেচনত আহিছিল ।
কিন্তু সময় মতে ৰেল ষ্টেচন আহি নোপোৱাত পুনৰ হাউলীৰ কদমগুৰীলৈ ML05M0071 নম্বৰৰ বাহনৰে উভতি যায় ৷ উভতি গৈ থকা অৱস্থাত ৰাষ্ট্ৰীয় ঘাইপথৰ কাষত ৰখাই থোৱা AS15AC1988 নম্বৰৰ বালি কঢ়িওৱা ট্ৰেক্টৰৰ পিছফালে খুন্দিওৱাৰ ফলত দুৰ্ঘটনা সংঘটিত হয় ।
খুন্দাত বাহনখন চূৰ্ণ-বিচূৰ্ণ হয় আৰু এজনী কণমানি থিতাতে নিহত হয় । বাকী গুৰুতৰভাৱে আহত হোৱা তিনিজনক বৰপেটাৰোডৰ গ্ৰাম্য চিকিৎসালয়ত ভৰ্তি কৰা হৈছে ৷ ইয়াৰে মুকলেশ মল্লিকৰ অৱস্থা সংকটজনক হোৱাত তেওঁক গুৱাহাটীলৈ প্ৰেৰণ কৰা হয় ৷ ঘটনাটোৰ ফলত সমগ্ৰ অঞ্চলজুৰি শোকাকুল পৰিৱেশৰ সৃষ্টি হৈছে ৷
