তালিবানে কাবুল দখল কৰাৰ পাছৰে পৰা আফগানিস্তানৰ কাৰাগাৰৰ পৰা মুক্তি লাভ কৰিলে শতাধিক জইছ-ই-মহম্মদ (জে ই এম)ৰ সন্ত্ৰাসবাদীয়ে । জম্মু-কাশ্মীৰসহ ভাৰতৰ বিভিন্ন প্ৰান্তত অনুপ্ৰৱেশ কৰি ভয়াবহ বিস্ফোৰণ সংঘটিত কৰা আৰু নানা ধৰণৰ সন্ত্ৰাসবাদী কাৰ্যকলাপৰ বাবে ব্যাপক প্ৰস্তুতি চলাইছে জে ই এমৰ এইসকল সন্ত্ৰাসবাদীয়ে ।
জে ই এমৰ নেতাৰ স’তে যোগাযোগ ৰখা এনে ব্যক্তিয়ে সামাজিক মাধ্যমত প্ৰচাৰ কৰা বিভিন্ন ‘প’ষ্ট’ৰ জৰিয়তে ভাৰতীয় চোৰাংচোৱাই লাভ কৰা তথ্য অনুসৰি, জইছ-ই-মহম্মদৰ মুৰব্বী মৌলানা মাছুদ আজহাৰে সম্প্ৰতি এই শতাধিক সন্ত্ৰাসবাদীক বিভিন্ন কূটাঘাতমূলক কাম-কাজৰ বাবে প্ৰশিক্ষণ প্ৰদান কৰিছে । কেনেকৈ আৰু কোন পথেৰে ভাৰতত প্ৰৱেশ কৰিব পাৰি, কোন পথেৰে কাশ্মীৰত প্ৰৱেশ সহজ – এইবোৰ বিষয়ত জে ই এমৰ মুৰব্বীজনে সন্ত্ৰাসবাদী সংগঠনটোৰ সদস্যসকলক সম্প্ৰতি প্ৰশিক্ষণ দিছে । ভাৰতৰ চোৰাংচোৱা আৰু নিৰাপত্তা সংস্থাই শেহতীয়াভাৱে এনে উদ্বেগজনক তথ্য লাভ কৰিলে ।
চোৰাংচোৱাৰ এজন শীৰ্ষ বিষয়াই ৰাষ্ট্ৰীয় সংবাদ মাধ্যমৰ আগত এই তথ্য প্ৰকাশ কৰি কয়, ‘যোৱা সপ্তাহতে মাছুদ আজহাৰে উক্ত সন্ত্ৰাসবাদীৰ স’তে আলোচনাত মিলিত হোৱাৰ খবৰ আমি লাভ কৰিছো । এই বৈঠকতে ভাৰতত আক্ৰমণৰ বাবে জে ই এমৰ সদস্যসকলক সেউজ সংকেত দিলে মাছুদে । কাশ্মীৰসহ ভাৰতৰ বিভিন্ন অঞ্চলত এটাৰ পাছত আন এটা বৃহৎ বিস্ফোৰণ আৰু সন্ত্ৰাসবাদীৰ আক্ৰমণৰ বাবে মাছুদ বাহিনীয়ে পৰিকল্পনা যুগুত কৰিছে । এই ক্ষেত্ৰত তালিবানেও জে ই এমৰ নেতৃত্বক সহায়ৰ আশ্বাস দিছে । জে ই এমৰ নেতৃত্বৰ স’তে তালিবানৰ শীৰ্ষ নেতাই একাধিক বৈঠকত মিলিত হৈছিল ।
জইছ-ই-মহম্মদৰ বহু সন্ত্ৰাসবাদীক আফগানিস্তানৰ বিভিন্ন প্ৰদেশৰ কাৰাগাৰত বন্দী কৰি ৰাখিছিল দেশৰ প্ৰাক্তন ৰাষ্ট্ৰপতি আশ্ৰফ ঘানিৰ চৰকাৰে । কিন্তু যোৱা ১৫ আগষ্টত তালিবানে কাবুল দখল কৰাৰ পাছত কপাল ফুলিল জে ই এমৰ বন্দী সন্ত্ৰাসবাদীসকলৰ । তালিবানে ক্ষমতা লাভৰ পাছতে আফগানিস্তানৰ বিভিন্ন কাৰাগাৰত বন্দী হৈ থকা জে ই এমৰ নেতাসকলক মোকলাই দিয়ে ।
ভাৰতৰ বিভিন্ন নিৰাপত্তা আৰু চোৰাংচোৱাৰ খবৰ অনুসৰি, আফগানিস্তানৰ বিভিন্ন জিলাৰ পৰা মুক্তি লাভ কৰা এইসকল জে ই এমৰ সন্ত্ৰাসবাদীৰ মাজৰ পৰা কমেও ১০০ জনক নিৰ্বাচন কৰি সম্প্ৰতি মাছুদ বাহিনীয়ে প্ৰশিক্ষণ দিছে । এই শতাধিক সন্ত্ৰাসবাদীক ভাৰতত কূটাঘাত সংঘটিত কৰিবলৈ জে ই এমে প্ৰেৰণ কৰিব আৰু তেওঁলোকৰ প্ৰথম লক্ষ্য হ’ব জম্মু-কাশ্মীৰ ।
ভাৰতীয় চোৰাংচোৱাই লগতে খবৰ লাভ কৰিছে যে কাবুল দখল কৰাৰ পাছতে তালিবানৰ স’তে একাধিকবাৰ বৈঠকত মিলিত হৈছিল জে ই এমৰ শীৰ্ষনেতাই । চোৰাংচোৱাৰ প্ৰতিবেদনত দাবী কৰা অনুসৰি, পাকিস্তানৰ সেনা বাহিনীয়ে ছলে-বলে কৌশলৰে কাশ্মীৰত সন্ত্ৰাসবাদীক অনুপ্ৰৱেশৰ অপেচেষ্টা দীৰ্ঘদিন ধৰি চলাই আহিছে । এই ক্ষেত্ৰত পাকিস্তান কেতিয়াবা সফল আৰু আন কেতিয়াবা বিফল হৈছে । কাবুলত তালিবানৰ স’তে জে ই এমৰ নেতাই যোৱা সপ্তাহত বৈঠকত অংশ লোৱাৰ পাছত পাক সেনা বাহিনী আৰু পাকিস্তানী সন্ত্ৰাসবাদী সংগঠনসমূহো এই বিষয়ত উৎসাহিত হৈ উঠিছে বুলি ভাৰতীয় চোৰাংচোৱাই প্ৰতিবেদনত উল্লেখ কৰিছে ।
চোৰাংচোৱাৰ খবৰ অনুসৰি, আফগানিস্তানত যে আকৌ এবাৰ তালিবানে শক্তিশালী ৰূপত আত্মপ্ৰকাশ কৰিবলৈ সাজু হৈছে, ইয়াৰ ইংগিত কে’বামাহ পূৰ্বেই স্পষ্ট হৈছিল । সেই সময়তে ধাৰণা কৰা হৈছিল যে তালিবানৰ সহযোগিতাত কাশ্মীৰত পুনৰ জইছ-ই-মহম্মদৰ সন্ত্ৰাসবাদীয়ে উগ্ৰমূৰ্তি ধাৰণ কৰিবলৈ প্ৰস্তুতি চলাইছে । সেয়েহে সম্প্ৰতি কাশ্মীৰত আত্মগোপন কৰি থকা জইছ-ই-মহম্মদৰ সন্ত্ৰাসবাদীৰ সন্ধানত ভাৰতীয় নিৰাপত্তা বাহিনীয়ে তালাচী অভিযান ব্যাপক কৰি তুলিছে ।
যোৱা ৩১ জুলাইত ভাৰতীয় সেনাৰ স’তে হোৱা এক সংঘৰ্ষত কাশ্মীৰৰ পুলৱামাৰ ত্ৰালৰ হাগাংলমাৰ্গ অৰণ্যত আত্মগোপন কৰি থকা জে ই এমৰ দুজন পাকিস্তানী কামাণ্ডাৰ মহম্মদ ইছমাইল আৰু আব্দুল ৰছিদ ঘাজি নিহত হৈছিল । ভাৰতীয় সেনাই দাবী কৰা অনুসৰি, ২০১৯ৰ ১৪ ফেব্ৰুৱাৰীত পুলৱামাত জইছ-ই-মহম্মদে চিআৰপিএফক লক্ষ্য হিচাপে যি ভয়াবহ আক্ৰমণ সংঘটিত কৰিছিল, এই ঘটনাৰ মূল পৰিকল্পক আছিল ইছমাইল আৰু আব্দুল ।
দীৰ্ঘদিন ধৰি কাশ্মীৰ উপত্যকাত ইছমাইল আৰু আব্দুলে স্থানীয় যুৱকক জইছ-ই-মহম্মদত যোগদান কৰিবলৈকো প্ৰৰোচিত কৰি আহিছিল । চোৰাংচোৱাৰ শংকা অনুসৰি, এই দুই সন্ত্ৰাসবাদীক সেনাই ধৰাশায়ী কৰাৰ প্ৰতিৰোধ ল’বলৈ জে ই এমে কাশ্মীৰত যিকোনো সময়তে ভয়াবহ আক্ৰমণ সংঘটিত কৰিব পাৰে । ইয়াৰ প্ৰস্তুতিৰ উদ্দেশ্যৰে যোৱা সপ্তাহত কাবুলত তালিবান নেতাৰ স’তে বৈঠকত অংশ লৈছিল জইছ-ই-মহম্মদৰ নেতা মাছুদে ।