পশ্চিম কাৰ্বি আংলঙৰ অসম-মেঘালয় সীমান্তত অসমৰ ভূমিত মেঘালয়ৰ আগ্ৰাসন আৰু সংঘাত আজিও অব্যাহত আছে । সীমা বিবাদৰ সংঘাত অব্যাহত থকাৰ সময়তে কাৰ্বি আংলঙৰ এক অংশ অথবা এক ইঞ্চি মাটিও মেঘালয়ক নিদিয়াৰ হুংকাৰ দিছে শেহতীয়াকৈ কংগ্ৰেছ-এএছডিচি ৰাজনৈতিক দল দুটাই ।
অসম-মেঘালয় চৰকাৰে আলোচনা আৰু গোপন বুজাবুজিৰ মাজেৰে গ্ৰহণ কৰিব বিচৰা “দিয়া আৰু লোৱা নীতিক” কোনো প্ৰকাৰে মানি নলয় আৰু সমৰ্থন নকৰে বুলি পশ্চিম কাৰ্বি আংলঙৰ লাংহেমফিত কংগ্ৰেছ-এএছডিচি-য়ে যৌথভাৱে অনুষ্ঠিত কৰা সীমা সমস্যা সমাধান সভাত স্পষ্টভাৱে প্ৰকাশ কৰে দল দুটাই । আনকি কাৰ্বি ছাত্ৰ সন্থাইয়ো এই সন্দৰ্ভত বিৰোধিতা কৰাৰ লগতে শীঘ্ৰে সমস্যা সমাধানৰ দাবী জনায় । অন্যথা অনাগত সময়ত চৰকাৰে উচিত ব্যৱস্থা গ্ৰহণ নকৰিলে উমৈহতীয়াভাৱে আন্দোলন গঢ়ি তুলিবলৈ বাধ্য হ’ব বুলিও সকীয়নি দিয়ে ছাত্ৰ সংগঠনৰ লগতে ৰাজনৈতিক দল দুটাই ।
উল্লেখযোগ্য যে ৰামছিং টেৰাং আৰু বিজয় টেৰণৰ সভাপতি মণ্ডলীৰ সভাপতিত্বত অনুষ্ঠিত গণ সমাৱেশত কাৰ্বি আংলং স্বায়ত্ব শাসিত পৰিষদৰ প্ৰাক্তন মুখ্য কাৰ্যবাহী সদস্য জৎচন বে, প্ৰাক্তন কাৰ্যবাহী সদস্য ছিং টেৰণ, জিলা কংগ্ৰেছৰ সভাপতি ছাৰ্থে ক্ৰামছা, এএছডিচিৰ কেন্দ্ৰীয় সমিতিৰ নেতা ছাৰ ছিং ইংলেং, কাৰ্বি ছাত্ৰ সন্থা, চিচিইউ, মহিলা কংগ্ৰেছ, গোৰ্খা ছাত্ৰ সংগঠনকে আদি কৰি কে’বাটাও জাতীয় সংগঠনসমূহৰ নেতৃবৃন্দৰ উপৰিও সীমান্তৰ গণ্যমান্য ব্যক্তিসকলেও অংশগ্ৰহণ কৰে ৷
গণ সমাৱেশত অসম-মেঘালয়ৰ মুখ্যমন্ত্ৰীদ্বয়ে সীমাৰ সন্দৰ্ভত আলোচনা কৰা “দিয়া আৰু লোৱা” নীতিক দল আৰু জাতীয় সংগঠনসমূহৰ নেতৃবৃন্দই এক মুখে ধিক্কাৰ প্ৰদান কৰাৰ লগতে তেজ দিম কিন্তু অসমৰ কাৰ্বি ভূমিৰ এক ইঞ্চি মাটিও মেঘালয়ক হস্তান্তৰ নকৰো বুলি হুংকাৰ দিয়ে এএছডিচি-কংগ্ৰেছে । লগতে সময় সাপেক্ষে দল দুটাই জংঘী আন্দোলনো গঢ়ি তোলাৰ হুংকাৰ প্ৰদান কৰে ।
