বৰপেটা লোকসভা সমষ্টিৰ কলগাছিয়া ৰাজহ চক্ৰৰ অন্তৰ্গত নিজ গাঁও বৰটাৰীত আই আৰু মানাহ নৈৰ গৰাখহনীয়া অঞ্চল পৰিদৰ্শন কৰে সাংসদ আব্দুল খালেকে । উল্লেখযোগ্য যে যোৱা কিছুদিন ধৰি বেঁকী, মানাহ আৰু আই নদীৰ বিধ্বংসী খহনীয়াত ইতিমধ্যে জনীয়া, বাঘবৰ, উত্তৰ অভায়াপুৰী সমষ্টিৰ শ শ পৰিয়ালৰ ভেটি-মাটি, ৰাস্তা-ঘাট, শিক্ষানুষ্ঠান, খেতি-পথাৰ আদি নৈৰ বুকুত জাহ গৈছে ।
সাংসদগৰাকীৰ নিজ গৃহ ভূমি বৰটাৰীতো আই আৰু মানাহ নৈৰ খহনীয়াই ৰুদ্ৰমূৰ্তি ধাৰণ কৰি ১০টা পৰিয়ালৰ ভেটি-মাটি উছন কৰাৰ লগতে বিকল্প ৰাজ্যিক ঘাইপথৰ পকী দলঙলৈ ভাবুকিৰ সৃষ্টি কৰিছে । গৰাখহনীয়া সন্দৰ্ভত সাংসদগৰাকীয়ে কয় যে, চৰকাৰে খহনীয়া প্ৰতিৰোধৰ বাবে ক্ষিপ্ৰতাৰে কাম কৰা নাই । সেই কাৰণে সমস্যাটো জটিল হৈছে ।
বিজ্ঞান সন্মতভাৱে খহনীয়া প্ৰতিৰোধ কৰাৰ বাবে ৰাজ্য আৰু কেন্দ্ৰীয় চৰকাৰক ব্যৱস্থা গ্ৰহণ কৰাৰ আহ্বান কৰাৰ লগতে খহনীয়াত গৃহহীন পৰিয়ালক প্ৰমাণপত্ৰ প্ৰদান কৰিবলৈ আহ্বান জনায় ।