দেশৰ বাবে কংগ্রেছে যি কৰিছিল, সাত বছৰতে সেয়া বিক্রী কৰিছে বিজেপি নেতৃত্বাধীন এনডিএ চৰকাৰে । দলৰ ছাত্র শাখাৰ সমাবেশত কালি এই অভিযোগ কৰিছে কংগ্রেছ নেতা ৰাহুল গান্ধীয়ে । তেওঁৰ অভিযোগ, পোলৱামা আক্ৰমণৰ পাছতো নৰেন্দ্র মোদীৰ বিৰুদ্ধে এটা শব্দও কোৱা নাই সংবাদমাধ্যমে ।
কংগ্রেছৰ ছাত্র শাখা নেচনেল ষ্টুডেন্টছ ইউনিয়ন অৱ ইণ্ডিয়া (এনএছইউআই) সমাবেশ ‘সংকল্প ২০২১-ৰ নৰেন্দ্র মোদী চৰকাৰক তুলোধোনা কৰে ৰাহুলে । তেওঁৰ অভিযোগ, দেশৰ যাৱতীয় সম্পদ বিক্রী কৰিছে মোদী চৰকাৰে । তেওঁ কয়, ‘‘কংগ্রেছে দেশ গঠনৰ কাম কৰিছে । ৭০ বছৰ ধৰি কঠোৰ পৰিশ্রম কৰি আমি (কংগ্রেছ) দেশৰ বাবে যি সম্পদ তৈয়াৰ কৰিছিলো, বিজেপিয়ে সাত বছৰত সেয়া বিক্রী কৰিছে ।’’
সেই সমাবেশত সংবাদমাধ্যমৰ সমালোচনাও কৰিবলৈ বাদ নিদিয়ে কংগ্রেছৰ প্রাক্তন সভাপতিগৰাকীয়ে । তেওঁ কয়, ‘‘ইউপিএ-ৰ আমোলত মুম্বাই আক্ৰমণৰ পাছত সংবাদমাধ্যমে তৎকালীন প্রধানমন্ত্রী মনমোহন সিঙক দুর্বল প্রধানমন্ত্রী আখ্যা দিছিল । সেই সংবাদমাধ্যমেই পোলৱামা সন্ত্ৰাসবাদী আক্ৰমণৰ পাছত নৰেন্দ্র মোদীৰ বিৰুদ্ধে এটা প্রশ্নও উত্থাপন নকৰে ।’’
কংগ্রেছ নেতাজনৰ অভিযোগ, মোদীৰ আমোলত একাধিক সন্ত্রাসবাদী আক্ৰমণৰ ঘটনা সংঘটিত হৈছে । কিন্তু ইউপিএ-ৰ আমোলত যিদৰে সংবাদমাধ্যমে চৰকাৰ আৰু প্রধানমন্ত্রীৰ সমালোচনা কৰিছিল, এই আমোলত নকৰে । ৰাহুলৰ মতে, ভাৰতৰ ভূখণ্ডত চীনৰ সেনাবাহিনীৰ প্রৱেশ হওক বা কেন্দ্রৰ তিনটি কৃষি আইনৰ বিৰুদ্ধে দিল্লী সীমান্তত কৃষকসকলৰ বিক্ষোভে — সংবাদমাধ্যমত যি গুৰুত্ব পাব লাগিছিল, সেই গুৰুত্ব পোৱা নাই ।
কৰ’নাকালত কংগ্রেছৰ ছাত্র শাখাৰ কর্মীসকলে যিদৰে কাম কৰিছে, তাৰ বাবে তেওঁলোকক অভিনন্দন জনালে ৰাহুলে । ছাত্র শাখাৰ সদস্য-কর্মীসকলৰ প্রতি তেওঁৰ আহ্বান, ‘‘গণতন্ত্র-বিৰোধী চৰকাৰৰ বিৰুদ্ধে সর্বাত্মক যুঁজ দিব লাগিব । কাম কৰি যাব লাগিব ছাত্র-ছাত্রীসকলৰ স্বার্থতো ।’’