গোসাঁইগাঁও মহকুমাৰ ৰাইমনা ৰেঞ্জৰ অধীনস্থ বিভিন্ন অঞ্চলৰ পৰা মুঠ ৫৭জন চোৰাংচিকাৰীয়ে আজি অনুষ্ঠানিকভাৱে অস্ত্ৰসহ আত্মসমৰ্পণ কৰে । তেওঁলোক ইমানদিনে এছিয়াৰ সৰ্ববৃহৎ ৰিপু সংৰক্ষিত বনাঞ্চলৰ কচুগাঁও বন সংমণ্ডলৰ ভাৰত-ভূটান সীমান্তৱৰ্তী বনাঞ্চলত চোৰাংচিকাৰী বৃত্তিৰ স’তে জড়িত হৈ আছিল । চোৰাংচিকাৰৰ স’তে জড়িত লোক সকলে আজি গোসাঁইগাঁৱৰ মথামবিল বজাৰৰ নিচেই কাষত অনুষ্ঠিত এখন অস্ত্ৰ সম্বৰণ অনুষ্ঠানত অস্ত্ৰ সম্বৰণ কৰে ।
উক্ত অনুষ্ঠানত কচুগাঁও বন সংমণ্ডলৰ বন বিষয়া, বিটিচিৰ প্ৰধান প্ৰমোদ বড়ো, বন বিভাগৰ কাৰ্যবাহী সদস্য ৰঞ্জিত বসুমতাৰী, বন বিভাগৰ চি এইচ ডি অনুৰাগ সিং উপস্থিত থাকে । উক্ত আত্মসমৰ্পণ অনুষ্ঠানত গোসাঁইগাঁও মহকুমাৰ অন্তৰ্গত তথা ৰিপু সংৰক্ষিত বনাঞ্চলৰ দাঁতি কাষৰীয়া অঞ্চলৰ ৫৭জন চোৰাংচিকাৰীৰ চিকাৰত ব্যৱহৃত ৩৪টা হস্ত নিৰ্মিত বন্দুক জমা কৰাৰ লগতে হাতীৰ দাঁত, হৰিণৰ সিং জমা কৰে ।
অস্ত্ৰ সম্বৰণ কৰা প্ৰতিজন চোৰাংচিকাৰীক ৫০ হেজাৰকৈ টকা প্ৰদান কৰে । বিশ্ব গঁড় দিৱসৰ লগত সংগতি ৰাখি এই অস্ত্ৰ সম্বৰণ অনুষ্ঠানৰ আয়োজন কৰিছে ।
