অসম নগালেণ্ড সীমান্তৰ লাহৰীজানত চাৰি কোটি টকাৰ হেৰইন জব্দ

আৰক্ষীৰ উপৰ্যুপৰি ড্ৰাগছবিৰোধী অভিযানৰ পাছতো দৌৰাত্ম্য হ্ৰাস পোৱা নাই ড্ৰাগছ সৰৱৰাহকাৰী ৷ বিশেষকৈ সৰৱৰাহৰ অভিকেন্দ্ৰ মণিপুৰৰ পৰা নিয়মীয়াকৈ ড্ৰাগছ সৰৱৰাহ হৈ থকা স্পষ্ট হৈ পৰিছে ৷

বুধবাৰে নিশা মণিপুৰৰ পৰা গুৱাহাটী অভিমুখী এ.আৰ২০-২৭০০ নম্বৰৰ এখন নৈশ বাছৰ পৰা কাৰ্বি আংলংৰ লাহৰীজান পহৰাদাৰী চকীৰ আৰক্ষীয়ে জব্দ কৰা আন্তৰাষ্ট্ৰীয় বজাৰ মূল্যত চাৰি কোটি টকাৰ নিষিদ্ধ হেৰইন ৷

আৰক্ষীৰ সুত্ৰ অনুসৰি, ৩৬ নং ৰাষ্ট্ৰীয় ঘাইপথত লাহৰীজান পহৰাদাৰ চকীৰ সমুখত চলা নিয়মীয়া তালাচীত এই বৃহৎ পৰিমাণৰ ড্ৰাগছখিনি উদ্ধাৰ হয় ৷

৪৮ টা চাবোনৰ বাকছত ভৰাই অনা হেৰইনখিনিৰ ওজন আছিল ৫৮৪ গ্ৰাম ৷ আৰক্ষীয়ে বাছখনৰ পৰা দুই সৰৱৰাহকাৰী মণিপুৰৰ পশ্চিম ইম্ফলৰ ইৰেংবাম ক’কিল আৰু ইৰেংবাম বাবু সিংক আটক কৰে ৷ ধৃত দুই সৰৱৰাহকাৰীক অধিক তথ্যৰ বাবে আৰক্ষীয়ে জেৰা অব্যাহত ৰাখিছে