আফগানিস্তানত তালিবানে দ্বিতীয়বাৰ চৰকাৰ গঠনৰ পাছত বহু দেশে ত্রাণ আৰু অনুদানৰ বিপুল পৰিমাণৰ অর্থ পঠোৱা বন্ধ কৰিছে । তেনে সময়তে আফগানিস্তানত প্রবল খাদ্য সংকটৰ শংকা কৰিছে আন্তর্জাতিক মানৱ অধিকাৰ সংগঠনবোৰে । চীন আৰু তুৰস্কৰ দৰে কিছুসংখ্যক দেশে ইতিমধ্যে আফগানিস্তানত ত্রাণ পঠোৱা আৰম্ভ কৰিছে । এই পর্যন্ত নতুন দিল্লীয়ে তালিবান চৰকাৰক স্বীকৃতি নিদিলেও আফগানিস্তানৰ জনসাধাৰণক খাদ্যৰ যোগান ধৰিবলৈ আগবাঢ়ি আহিছিল ভাৰত । কিন্তু অভিযোগ, পাকিস্তান চৰকাৰৰ অনুমতি নোপোৱাৰ বাবে ভাৰতে আফগানিস্তানত ত্রাণ পঠাব পৰা নাই, ইয়াকে লৈ সংশয় দেখা দিছে ।
বৈদেশিক মন্ত্রণালয় সূত্রে জনানো হৈছে, সম্প্রতি ৫০ হেজাৰ মেট্রিক টন গম আফগানিস্তানত প্ৰেৰণ কৰিবৰ বাবে পাকিস্তানৰ পথ ব্যৱহাৰৰ অনুমতি বিচাৰিছিল ভাৰতে । বিপুল পৰিমাণৰ গম আকাশ পথেৰে পঠোৱাত সমস্যা হ’ব বুলি স্থলপথত ট্রাকেৰে পাকিস্তান হৈ আফগানিস্তানলৈ লৈ যোৱাৰ কথা ভাবিছিল । ইয়াৰ বাবে প্ৰায় পাঁচ হেজাৰ ট্রাকৰ প্রয়োজন । যোৱা মাহতেই ভাৰতে পত্ৰ লিখি পাক চৰকাৰৰ অনুমতি বিচাৰিছিল যাতে ট্রাকবোৰ পাকিস্তানত প্ৰৱেশ কৰিব পাৰে । সেই প্রস্তাৱত অসন্মতি জনায় পাকিস্তানে । কিন্তু ভাৰতৰ অভিযোগ, এই পৰ্যন্ত ইছলামাবাদে ট্রাকবোৰ দেশত সোমোৱাৰ অনুমতি দিয়া নাই । ফলত আফগানিস্তানত ত্রাণ পঠোৱাৰ বিষয়টো সম্পূৰ্ণ স্তব্ধ হৈ আছে ।
লগতে, আফগানিস্তান প্রসংগত ভাৰতে আহ্বান কৰা এক আলোচনাত তেওঁ অংশ নলয় বুলিও স্পষ্টভাৱে জনাইছে পাকিস্তানৰ ৰাষ্ট্ৰীয় নিৰাপত্তা উপদেষ্টা মইদ ইউছুফে । আফগানিস্তানৰ তালিবান চৰকাৰৰ পৰা চুবুৰীয়া দেশবোৰ সুৰক্ষিত হয় নে নহয়, সেই সন্দৰ্ভত আলোচনা কৰিবলৈ আগন্তুক ১০-১১ নৱেম্বৰত এটা সন্মিলনৰ আহ্বান জনাইছে ভাৰতৰ ৰাষ্ট্ৰীয় নিৰাপত্তা উপদেষ্টা অজিত ডোভালে । পাকিস্তানৰ লগতে, চীন, তৰস্ক, ইৰান, উজবেকিস্তান, তাজিকিস্তানকো বৈঠকত যোগ দিয়াৰ আমন্ত্রণ জনাইছিল ভাৰতে । কালি ইছলামাবাদত ভাৰতক কটাক্ষ কৰি মইদে সাংবাদিকসকলক কয়, ‘‘যিয়ে সমস্যা সৃষ্টি কৰে তেওঁলোক কেতিয়াও শান্তি প্রতিষ্ঠা কৰিব নোৱাৰে ।’’ সমগ্ৰ দক্ষিণ এছিয়াত সন্ত্ৰাসবাদী কার্যকলাপৰ বাবে ভাৰতকে দোষাৰোপ কৰে মইদে ।