মুখ্যমন্ত্রী ড° হিমন্ত বিশ্ব শৰ্মাৰ পৰামৰ্শ মৰ্মে আজি বাগসা জিলাৰ শালবাৰী মহকুমা সদৰত শিক্ষামন্ত্রী ৰণোজ পেগুৱে হঠাৎ উপস্থিত হৈ শালবাৰী মহাবিদ্যালয়, শালবাৰী চিকিৎসালয়, শালবাৰী মহকুমাৰ কাৰ্যালয়ৰ লগতে সাউদৰভিঠা প্ৰাথমিক চিকিৎসালয় পৰিদৰ্শন কৰে । পৰিদৰ্শন কৰি মন্ত্রী পেগুৱে সংবাদ মাধ্যমৰ স’তে হোৱা আলোচনাত কয়, “কাইলৈ বঙাইগাঁৱত অসম চৰকাৰৰ এখন কেবিনেট বৈঠক অনুষ্ঠিত হ’ব । প্ৰতিমাহৰ শেষৰ সপ্তাহত অনুষ্ঠিত কেবিনেট বৈঠকখন গুৱাহাটীৰ বাহিৰত অনুষ্ঠিত হয় । গুৱাহাটীৰ বাহিৰত অনুষ্ঠিত প্ৰতিখন কেবিনেট বৈঠক অনুষ্ঠিত হোৱাৰ আগতে মুখ্যমন্ত্রীৰ পৰামৰ্শ অনুসৰি আমি এখন মহকুমা পৰিদৰ্শন কৰিব লাগে হেতুকে আজি আমি বাগসা জিলাৰ শালবাৰী মহকুমা পৰিদৰ্শন কৰিলো । ইয়াৰ প্ৰতিবেদন মুখ্যমন্ত্রী মহোদয়ক দিম । আনহাতে, কেবিনেট বৈঠকৰ পৰা উভতি যোৱাৰ পিছতো আমি এখনকৈ মহকুমা পৰিদৰ্শন কৰিব লাগে । ইয়াৰ জৰিয়তে বিভিন্ন জিলা মহকুমাৰ বিষয়ে প্ৰত্যক্ষভাৱে নীৰিক্ষণ কৰি আমাৰ লগতে জিলা মহকুমাৰ কাৰ্যালয় বিষয়া সকলো উপকৃত হ’ব ৷’
এই ক্ষেত্ৰত মুখ্যমন্ত্ৰীৰ অভিনৱ পন্থাৰ শলাগ লয় শিক্ষামন্ত্ৰীগৰাকীয়ে ৷ সংবাদ মাধ্যমৰে হোৱা সাক্ষাৎকাৰত মন্ত্ৰী গৰাকীয়ে কেতবোৰ গুৰুত্বপূৰ্ণ মন্তব্য কৰি কয়, ‘টেট এটা কণ্টিনোৱাচ প্ৰক্ৰিয়া ৷ যেতিয়াই তেতিয়াই আমাৰ বিভিন্ন ধৰণৰ চৰকাৰী নথিপত্ৰ পুনৰীক্ষণ হয় ৷ কালিৰ পৰা অসমৰ সকলো কেটেগৰীৰ শিক্ষকক এটা প’ৰ্টেলত নিজৰ নিজৰ তথ্যপাতি পঞ্জীয়ন কৰিবলৈ কোৱা হৈছে ৷ ইয়াৰ উদ্দেশ্য-বদলীকৰণ ৷ তাৰ লগে লগে শিক্ষকসকলৰ যি মেনেজমেণ্ট, ক’ত তেওঁলোক নিযুক্ত হ’ব, ক’ত বেছি শিক্ষক, ক’ত কম শিক্ষক আছে সেই ব্যৱস্থাপনাৰ বাবে প’ৰ্টেলৰ ব্যৱস্থা কৰিছো ৷ প’ৰ্টেলত যি অতি প্ৰয়োজনীয় নথিপত্ৰ যেনে প’ষ্ট গ্ৰেজুৱেট, বিএড, ডিএলএড, টেট আদিৰ তথ্য শিক্ষকসকলে আপলোড কৰিব লাগিব ৷ আপলোড কৰা প্ৰক্ৰিয়াত তাৰ পৰীক্ষা নিৰীক্ষা কৰা হ’ব ৷ যিহেতু টেটক লৈ দুই এটা কেছ ধৰা পৰিছে, ভুৱা চাৰ্টিফিকেটৰ কথা ওলাইছে ৷ গতিকে সেয়া সতৰ্কতাৰে পৰীক্ষা নিৰীক্ষা কৰা হ’ব ৷ ভুৱা টেটক লৈ বিটিএডিতে নহয় ৰাজ্যখনতে ব্যৱস্থা হাতত লোৱা হ’ব ৷’
দুষ্টচক্ৰৰ জালত যাতে কোনো যুৱক-যুৱতীয়ে ভৰি নিদিয়ে তাৰ বাবে অনুৰোধ জনাই শিক্ষামন্ত্ৰীগৰাকীয়ে কয়, ‘অসমত টেট নিয়মীয়াকৈ অনুষ্ঠিত হৈ থাকিব ৷ অহা মাৰ্চৰ ভিতৰত সকলো টেটকে নিযুক্তি দিয়া আমি শেষ কৰিম ৷ শিক্ষা বিভাগটোক নতুন শিক্ষানীতিৰ আধাৰত ইয়াৰ অলপ গাঁথনিগত পৰিৱৰ্তন অনাৰ বাবে পদক্ষেপ লৈছো ৷ যিটো দুই-এদিনতে সকলোৱে গম পাব ৷ যি শৈক্ষিক প্ৰশাসন তাতো আমি সংশোধন অনাৰ বাবে ব্যৱস্থা গ্ৰহণ কৰিছো ৷ একেটা সময়তে শিক্ষানুষ্ঠান সমূহৰ আন্তঃগাঁথনি আৰু মানদণ্ড উন্নত কৰাৰ কাৰণে শিক্ষক সকলৰ প্ৰশিক্ষণৰ ব্যৱস্থা হাতত লৈছো ৷ টেটত পাছ কৰাই দিয়াৰ নামত এক দুষ্ট চক্ৰই ম’বাইলৰ জৰিয়তে যি মেছেজ দিয়াৰ ভয়ংকৰ জাল ৰচনা কৰিছে সেই বিষয়ত চিআইডিক দ্বায়িত্ব দিয়া হৈছে ৷ শিক্ষা বিভাগত যদি দালালৰাজ আছে তাৰ বিৰুদ্ধেও চৰকাৰৰ অভিযান অব্যাহত থাকিব ৷’
তেওঁ লগতে কয়, ‘বাণীকান্ত কাকতি কম্পিউটাৰ আঁচনিৰ অন্তৰ্ভুক্ত যি ঠিকাভিত্তিক কৰ্মচাৰী আছে তেওঁলোকৰ চাকৰি নিয়মীয়াকৰণ কৰা নহয় ৷ একেদৰে, কোনো ঠিকাভিত্তিক শিক্ষকৰে চাকৰি নিয়মীয়াকৰণ নহয় ৷ কিন্তু তেওঁলোকক ৬০ বছৰ বয়সলৈকে চাকৰিৰ এটা গেৰেণ্টি দিব পৰা যায় নেকি, সমাহাৰত বেতন দিব পৰা যায় নেকি এই কথাবিলাক পৰীক্ষা-নিৰীক্ষা কৰি থকা হৈছে ৷’
