আজি ভেকচিনৰ বুষ্টাৰ ড’জ দিয়াৰ পৰামর্শ দিলে বিশ্ব স্বাস্থ্য সংস্থা (হু)ৱে । বার্ধক্য বা কোনো শাৰীৰক অসুস্থতাত দুর্বল লোকসকলক আৰু যিসকলে ইনএক্টিভেটেড ভেকচিন লৈছে, তেওঁলোকক আগতে বুষ্টাৰ ড’জ দিয়াত জোৰ দিছে হু-ৱে । উল্লেখ্য যে, এই ইনএক্টিভেটেড ভেকচিনৰ তালিকাত আছে ভাৰত বায়’টেকৰ তৈয়াৰী ক’ভেক্সিনো ।
কৰ’নাৰ অ’মিক্রন ষ্ট্ৰেন অহা বহু আগতেই একাধিক দেশে বুষ্টাৰ ড’জ দিয়া আৰম্ভ কৰিছিল । মূলত প্রবীণ বা অসুস্থতাত দুর্বল লোকসকলক প্ৰথমতে তৃতীয় ড’জ দিয়াত অগ্রাধিকাৰ দিয়া হৈছে এইসমূহ দেশত । বুষ্টাৰ ড’জ দিয়া প্রথম আৰম্ভ কৰে ব্রিটেইন আৰু ইজৰায়েলে । তেতিয়া দেশসমূহৰ এই সিদ্ধান্তৰ তীব্র সমালোচনা কৰিছিল হু-ৱে । টিকাৰ অসমবণ্টনক লৈও অভিযোগ কৰিছিল তেওঁলোকে । তেওঁলোকৰ মতে, বিশ্বৰ একাংশই টিকাহীন অৱস্থাত থকাৰ সময়তে ধনী দেশসমূহে কিয় তৃতীয় ড’জ দিয়া আৰম্ভ কৰিছে । এই ঘটনাৰ কিছু মাহৰ পাছতে এইবাৰ হু-ৱেও বুষ্টাৰ ড’জৰ পৰামর্শ দিলে । হু-ৰ ‘ষ্ট্ৰেটেজিক এডভাইজৰী গ্রুপ অৱ এক্সপার্টছ’ (ছেজ)ৰ বৈঠকত এই সিদ্ধান্ত লোৱা হয় ।
হু-ৱে কয় যে, যিসকল শাৰীৰকভাৱে দুর্বল আৰু যিসকলে ইনএক্টিভেটেড ভেকচিন লৈছে, তেওঁলোকক বুষ্টাৰ ড’জ দিয়া হওক । ইনএক্টিভেটেড ভেকচিন হ’ল, যিসমূহ শৰীৰত ছাৰ্ছ-ক’ভ-২-ৰ প্রৱেশ ঘটে তাক নিষ্ক্রিয় কৰে বা হত্যা কৰে । চীনৰ ‘ছিনোভেক’, ‘ছিনোফার্ম’ আৰু ভাৰতৰ ‘ভাৰত বায়’টেক’ সংস্থাই প্ৰস্তুত কৰা টিকা এই ধৰণৰ ভেকচিন ।
ছেজ-ৰ তৰফৰ পৰা জনোৱা হৈছে, প্রবীণসকলৰ শৰীৰত ভেকচিনৰ কার্যকাৰিতা উল্লেখযোগ্যভাৱে কমি গৈছে । তেওঁলোকৰ মতে, টিকাৰ দ্বিতীয় ড’জ লোৱাৰ পাছত ছমাহ পর্যন্ত ভেকচিনে ভালকৈ কাম কৰে । কিন্তু তাৰ পাছতেই ইয়ৰ কার্যক্ষমতা কমে । যিহেতু প্রবীণসকলক সৰ্বপ্ৰথমে টিকাকৰণ কৰা হৈছে, সেয়ে এতিয়া তেওঁলোকৰ শৰীৰত টিকাৰ প্রভাৱ কমি আহিছে ।
অ’মিক্রন আতংকত সম্প্ৰতি সার্বিকভাৱেই দেশবাসীক বুষ্টাৰ ড’জ দিয়া আৰম্ভ কৰিছে একাধিক দেশে । এই সন্দৰ্ভত হু-ৰ বক্তব্য, বুষ্টাৰ ড’জ দিয়াৰ লগতে দেশৰ প্রত্যেকৰে প্রথম ড’জ নিশ্চিত কৰাও প্ৰয়োজনীয় ।
প্রথম বিশ্বৰ একাধিক দেশত টিকাকৰণৰ গতি বেচ শিথিল । ইউৰোপৰ বহুকেইখন দেশত মুঠ টিকাকৰণৰ হাৰ ৫৫ শতাংশৰ তলত । ইয়াৰ বাবে অনেকাংশত দায়ী বাসিন্দাসকলৰ টিকা লোৱাত অনীহা । সম্প্রতি জার্মানী, ইটালীসহ কিছু দেশে ঘোষণা কৰিছে, টিকা নল’লে গৃহবন্দী হৈ থাকিব লাগিব । পোলেণ্ডত স্বাস্থ্যকর্মী আৰু শিক্ষকসকলৰ টিকা লোৱা বাধ্যতামূলক ঘোষণা কৰা হৈছে ।
ইপিনে, টিকা ল’বৰ বাবে বাসিন্দাসকলৰ একাংশক জোৰ কৰিবলগীয়া হৈছে, অন্য অংশত বুষ্টাৰ (তৃতীয়) ড’জ দিয়া আৰম্ভ হৈছে । ফলত একাংশ লোক মাৰাত্মক শংকাপূৰ্ণ অৱস্থাত আছে বুলি ধাৰণা কৰিছে বিশেষজ্ঞসকলে ।
