ৰবৰ গছৰ বাগানেৰে স্বাৱলম্বিতাৰ উৎকৃষ্ট নিদৰ্শন দাঙি ধৰিবলৈ সক্ষম হৈছে বাগসাৰ শালবাৰীৰ এগৰাকী লোকে ৷ শালবাৰীৰ মায়ংপাৰাৰ বীৰেন বসুমতাৰী নামৰ লোকজনে নিজৰ প্ৰচেষ্টাত নিজৰ এশ বিঘা মাটিত গঢ়ি তুলিছে ৰবৰ গছৰ এক বৃহৎ বাগান ৷ বীৰেনে ৰবৰ গছৰ পৰা উৎপাদিত হোৱা আঠা গুৱাহাটীলৈ ৰপ্তানি কৰি নিজে আৰ্থিকভাৱে লাভৱান হোৱাৰ লগতে আন ১০ গৰাকী লোকৰ পৰিয়ালক এই ব্যৱসায়ৰ জৰিয়তে পোহপাল দি আহিছে ৷
এশ বিঘা মাটিত ৰবৰ গছৰ বাগান গঢ়ি তোলা বীৰেনে কিন্তু আবেদন কৰাৰ পাছতো আজি পৰ্যন্ত চৰকাৰীভাৱে কোনো ধৰণৰ সুবিধা পাবলৈ সক্ষম ন’হল ৷ বিগত ১০ বছৰে ৰবৰ গছৰ বাগানৰ ব্যৱসায়ৰ জৰিয়তে স্বাৱলম্বী হোৱা বীৰেনে এতিয়া আন বহু নিবনুৱাৰ প্ৰতি আদৰ্শ স্বৰূপ হৈ পৰিছে ৷
তেওঁ জানিবলৈ দিয়া মতে, প্ৰথমে নাৰ্চাৰীৰ লগত যোগাযোগ কৰি ৰবৰ বাগান গঢ়ি তোলাৰ কথা চিন্তা-চৰ্চা কৰে আৰু সেই মতে কামত আগবাঢ়ে ৷ বঙাইগাঁৱৰ কাজলগাঁৱৰ পৰা ৰবৰ গছৰ পুলি ক্ৰয় কৰি আনি এতিয়া বীৰেনে গঢ়ি তুলিছে এখন সুন্দৰ সেউজ বৃহৎ ৰবৰ গছৰ বাগান ৷
উৎকট গৰমৰ দিনত ৰবৰ গছৰ ছাঁত ক্ষন্তেক জিৰণি ল’বলৈ বিভিন্ন প্ৰান্তৰ লোকে ঢাপলি মেলি আহে বুলিও জানিবলৈ দিয়ে বীৰেনে ৷
