কৰ’না ভাইৰাছৰ সকলো ৰূপেই ৰোগীৰ শৰীৰত এনে ধৰণৰ এন্টিবডি তৈয়াৰ কৰে, যিয়ে মানৱদেহত অন্যান্য ৰোগৰ প্রতিৰোধী এন্টিবডিবোৰক আক্রমণ কৰে ।
শৰীৰৰ বাবে ক্ষতিকৰ এই এন্টিবডিবোৰে ৰোগীৰ শৰীৰৰ বিভিন্ন অংশ বা অংগ-প্ৰতংগৰ কোষ-কলাবোৰক আক্রমণ কৰে । ৰোগী সুস্থ হোৱাৰ পাছতো দীর্ঘদিন ধৰি শৰীৰত এই ক্ষতিকৰ এন্টিবডিবোৰৰ প্রভাৱ থাকে ।
আলফা, বিটা, ডেল্টা, অ’মিক্রন । কৰ’না ভাইৰাছৰ সকলো ৰূপৰ সংক্রমণেই ৰোগীৰ শৰীৰত তৈয়াৰ হয় ক্ষতিকৰ এন্টিবডিবোৰ । কোনো ক্ষেত্রত কম, কোনো ক্ষেত্রত বেছি । মৃদু উপসর্গৰ ৰোগীৰ ক্ষেত্রত যেনে হয়, উপসর্গহীন ৰোগীৰ ক্ষেত্রতো একেই দেখা যায় । চিকিৎসাবিজ্ঞানৰ পৰিভাষাত এই ক্ষতিকৰ এন্টিবডিবোৰক কোৱা হয়— ‘অট’এন্টিবডি’ ।
সম্প্রতি এক গৱেষণাত এই খবৰ প্ৰকাশ পাইছে । গৱেষণাপত্রটো প্রকাশিত হৈছে আন্তর্জাতিক চিকিৎসাবিজ্ঞান গৱেষণা পত্রিকা ‘জার্নেল অৱ ট্রান্সলেছনেল মেডিচিন’-ত । এটা আন্তর্জাতিক দলে কৰা এই গৱেষণাৰ নেতৃত্ব দিছে আমেৰিকাৰ ছেডার্চ-চিনাই স্মিট হার্ট ইনষ্টিটিউটে ।
ইয়াৰ আগৰ গৱেষণাত পোৱা গৈছিল, ক’ভিড ভয়াৱহ হৈ উঠিলে ৰোগীৰ শৰীৰ স্বাভাৱিক প্রতিৰোধ ব্যৱস্থাৰ ওপৰত ইমানে বেছি চাপ পৰে যে তাৰ ফলত ৰোগীৰ শৰীৰত এই ক্ষতিকৰ এন্টিবডিবোৰ তৈয়াৰ হৈ যায় । যিটো ৰোগী সুস্থ হৈ উঠাৰ পাছতো কিছুদিন সক্রিয় হৈ থাকে ।
এই গৱেষণাত প্রথমে জনায়, মৃদু উপসর্গৰ বা উপসর্গহীন ৰোগীৰ শৰীৰতো এই ক্ষতিকৰ এন্টিবডিবোৰ তৈয়াৰ হয় আৰু সেইবোৰ ৰোগী সুস্থ হোৱাৰ পাছতো প্ৰায় ছমাহ সক্রিয় হৈ থাকে । যাৰ বাবে ৰোগীৰ বিভিন্ন অংগ-প্ৰতংগৰ ক্ষয়ক্ষতি হৈ থাকে দীর্ঘ সময় ধৰি ।
বিশেষজ্ঞসকলৰ একাংশৰ মতে, ক’ভিড অন্যান্য ভাইৰাছৰ সংক্রমণৰ তুলনাত কিয় অভিনৱ, এই গৱেষণাই তাৰ কিছুমান কাৰণ জনালে ।
গৱেষকসকলে ১৭৭ জন ক’ভিড ৰোগী আৰু সমসংখ্যক সুস্থ লোকৰ তেজৰ নমুনাৰ প্লাজমাৰ পৰা এন্টিবডি লৈ এই পৰীক্ষা চলাইছিল গৱেষণাগাৰত ।
তেওঁলোকে দেখে যে, ক’ভিডে মৃদু উপসর্গ থকা বা উপসর্গহীন ৰোগীৰ ক্ষেত্রত নানা ধৰণৰ ক্ষতিকৰ এন্টিবডি তৈয়াৰ কৰে, যাৰ প্রভাৱ দীর্ঘম্যাদি হয় ।
