ভাৰত বায়’টেকে (Bharat Biotech) তৈয়াৰ কৰা Intranasal Vaccine বা নাকেৰে লোৱা উপযুক্ত টিকাক কৰ’না টিকাৰ (COVID vaccine) বুষ্টাৰ ড’জ হিচাপে অনুজ্ঞাপত্র দিয়াৰ সম্ভাৱনা ডিজিসচিআই-ৰ । বুধবাৰে কেন্দ্রীয় সংস্থাৰ বিশেষজ্ঞ কমিটীৰ তৰফৰ পৰা টিকাৰ তৃতীয় পৰ্যায়ৰ ট্রায়েলত সন্মতি দিয়া হৈছে ।
তথ্য অনুসৰি, পাঁচ হেজাৰ সুস্থ ব্যক্তিৰ ওপৰত ট্রায়েল চলোৱা হ’ব । ইয়াৰ ভিতৰত অর্ধেকে ক’ভাক্সিন আৰু ক’ভিশিল্ড টিকাৰ সম্পূর্ণ ড’জ গ্রহণ কৰিছে । যোৱা ডিচেম্বৰৰ মাজভাগত ভাৰত বায়’টেকৰ তৰফৰ পৰা ক্লিনিকেল ট্রায়েল চলোৱাৰ অনুমতি বিচৰা হয় । ভাৰত বায়’টেকে কেন্দ্রক জনায়, যিসকলৰ সম্পূর্ণ টিকাকৰণ হৈছে তেওঁলোকক নেজাল ভেকচিন (Nasal Vaccine) বুষ্টাৰ ড’জ (Booster Dose) হিচাপে দিলে ভাল ফল পাব পাৰে ।
উল্লেখ্য, যোৱা মঙলবাৰে ডিজিচিআই এটা বৈঠক অনুষ্ঠিত কৰিছিল এই বিষয়ত । সেই বিষয়তেই বিশদ আলোচনা কৰা হয় । ইয়াৰ পাছতেই বুধবাৰে ট্রায়েলৰ অনুমতি দিযা হয় । অনুমান কৰা হৈছে যে, দ্বিতীয় ড’জ লোৱাৰ ছমাহ পাছতেই এই বুষ্টাৰ ড’জ (Booster Dose) ল’ব পৰা যাব । সম্ভৱত মার্চৰ পৰাই বুষ্টাৰ ড’জ আৰম্ভ কৰাৰ অনুমতি দিব কেন্দ্রই । অৱশ্যে এয়া নির্ভৰ কৰে সময় মতে বুষ্টাৰ ড’জ অনুমতি দিয়া হৈছে নে নাই তাৰ ওপৰত ।
ইপিনে, কৰ’নাৰ নতুন ষ্ট্ৰেন অ’মিক্রনৰ বিৰুদ্ধে যুদ্ধত নতুন বছৰৰ আৰম্ভণিৰ পৰাই ১৫ৰ পৰা ১৮ বছৰ বয়সৰসকলৰ টিকাকৰণৰ কাম আৰম্ভ হৈছে দেশত । সোমবাৰৰ পৰাই কম বয়সৰসকলে ক’ভাক্সিনৰ (Covaxin) টিকা লাভ কৰিছে । এই পর্যন্ত দেশত টিকাপ্রাপকৰ সংখ্যা মুঠ ১৪৬ কোটি ৭০ লাখ ১৮ হেজাৰ ৪৬৪ জন । কোনো লোক অ’মিক্রন আক্রান্ত হয় নে নহয়, সেয়া সহজে বুজ ল’বলৈ RT-PCR কিট ‘অ’মিশ্বিঅ’ৰ’ক সদ্য অনুমোদন দিছে আইচিএমআৰ-এ । দেশত বৰ্ধিত সংক্রমণক নিয়ন্ত্রণত আনিবলৈ তৎপৰ কেন্দ্র ।
বুধবাৰেও একেকোবে বৃদ্ধি পালে দেশৰ কৰ’না সংক্রমণ । কালিৰ পৰিসংখ্যাত আক্রান্তৰ সংখ্যা আছিল ৩৭ হেজাৰৰ কিছু অধিক, আজি এই সংখ্যা ৫৮ হেজাৰৰো অধিক হ’ল । অর্থাৎ মাত্র ২৪ ঘণ্টাত ডেৰগুণৰো (৫৫%) অধিক বৃদ্ধি পালে সংক্রমণ । ইয়াৰ লগতে বৃদ্ধি পাইছে মাৰণ ভাইৰাছত মৃত্যুৰ সংখ্যাও । উদ্বেগ বৃদ্ধি কৰিছে দেশৰ ঊর্ধ্বমুখী সক্ৰিয় ৰোগীৰ সংখ্যাই ।
