ৰাছিয়া আৰু ইউক্রেইনৰ মাজৰ যুদ্ধই আজি ছয় দিন অতিক্ৰম কৰিলে । ক্ৰমে পৰিস্থিতিৰ অধিক অবনতি ঘটা ইউক্ৰেইনত আবদ্ধ ভাৰতীয় ছাত্ৰ-ছাত্ৰী আৰু অন্যান্য লোকসকলক উদ্ধাৰ কৰি দেশলৈ ঘূৰাই অনাৰ প্ৰক্ৰিয়া কেন্দ্ৰীয় চৰকাৰে অব্যাহত ৰাখিছে । ইয়াৰ ফলশ্ৰুতিত আজিলৈকে অসমৰ নগৰাকী ছাত্ৰ-ছাত্ৰী গৃহৰাজ্যলৈ উভতি আহিবলৈ সক্ষম হয় । ইয়াৰে চাৰিগৰাকী ছাত্ৰ-ছাত্ৰী কালি উপস্থিত হয় বুলি অসম চৰকাৰৰ গৃহসচিব দিগন্ত বৰাই জনায় । তদুপৰি কমেও চাৰিগৰাকী ছাত্ৰ-ছাত্ৰী যুদ্ধ জৰ্জৰিত ৰাষ্ট্ৰখনৰ পৰা আহি কালি দিল্লীত উপস্থিত হয় । এইসকলৰ বিপৰীতে ইউক্ৰেইনত আবদ্ধ হৈ আছে অসমৰ কে’বা শতাধিক ছাত্ৰ-ছাত্ৰী । ইউক্ৰেইনৰ সীমান্তৱৰ্তী ৰাষ্ট্ৰ ৰোমানিয়া আৰু পোলেণ্ডৰ সীমাৰ ওচৰে-পাজৰে থকা ছাত্ৰ-ছাত্ৰীসকলকহে উদ্ধাৰৰ ক্ষেত্ৰত এই সময়ত ভাৰত চৰকাৰে গুৰুত্ব আৰোপ কৰিছে । অসমৰ বহু ছাত্ৰ-ছাত্ৰী দেশখনৰ ছুমি আৰু খাৰকিভত আবদ্ধ হৈ আছে । এই দুখন স্থানতে ৰাছিয়ান সেনাৰ দ্বাৰা সৰ্বাধিক আক্ৰমণ হৈছে । যাৰ বাবে এই দুখন ঠাইত আবদ্ধ কোনেও এই সময়ত ওলাব পৰা নাই । গতিকে এক চৰম অনিশ্চয়তা আৰু আতংকৰ মাজত সময় পাৰ কৰিবলগীয়া হৈছে আবদ্ধ ছাত্ৰ-ছাত্ৰীয়ে ।
ছুমিৰ পৰা কি জনালে আবদ্ধ ছাত্ৰই
ছুমিত আবদ্ধ হৈ থকা ছাত্ৰসকলৰ ভিতৰত এজন হ’ল দেৰগাঁৱৰ আৰক্ষী পৰীক্ষণ মহাবিদ্যালয় চৌহদৰ আবাসী তথা ছুমি ষ্টেট মেডিকেল ইউনিভাৰ্চিটিৰ পঞ্চম বৰ্ষৰ ছাত্ৰ নীলম কলিতা । কালি ছুমিৰ পৰা নীলমে ‘দৈনিক অগ্ৰদূত’ক কয় যে প্ৰতিদিনে ছুমিৰ পৰিস্থিতি অৱনমিত ঘটিছে । চৌদিশে কেৱল বোমা বিস্ফোৰণৰ শব্দ, ৰকেট লাঞ্চাৰ মৰ্টাৰৰ শব্দ । বাহিৰত সকলো বন্ধ হৈ পৰিছে । গতিকে যিয়ে য’ত আছে তাতে আবদ্ধ হৈ থাকিবলগীয়া হৈছে । চাৰিজন বন্ধুৰ স’তে এটা ফ্লেটত বাস কৰা নীলমে কয়, ‘আমি ফ্লেটত আছো । চাইৰেণ বাজিলে ফ্লেটৰ তলত থকা আশ্ৰয়স্থলীলৈ দৌৰ মাৰো । ৰাছিয়ান সেনাৰ আক্ৰমণত ছুমিৰ পৰিস্থিতি যথেষ্ট উদ্বেগজনক হৈ পৰিছে । ৰাছিয়ান সীমান্তৰ পৰা আমাৰ অঞ্চলটো ওচৰতে । যুদ্ধৰ আৰম্ভণিৰ সময়ত চাউল-দাইলকে ধৰি কিছু পৰিমাণে খাদ্য সামগ্ৰী যোগাৰ কৰিছিলো । সেইবোৰ ইতিমধ্যে শেষ হৈছে । এতিয়া ফল-মূল ওটছ আদি খাই আছো । এইবোৰো খুব বেছি চাৰিদিন যাব । তাৰ পাছত কি হ’ব নাজানো । আমাৰ ইয়াত দোকান-পোহাৰ, যোগাযোগ সকলো বন্ধ । অৱশ্যে ভাৰতীয় দূতাবাসে আমাৰ লগত যোগাযোগ ৰক্ষা কৰি আছে ।’
ভাৰতীয় দূতাবাসৰ পৰা পৰিস্থিতি কিছু নিয়ন্ত্ৰণ নোহোৱালৈকে ফ্লেটতে থকাৰ পৰামৰ্শ দিয়া হৈছে বুলিও নীলমে কয় । তেওঁ জনায় যে ছুমিত অসমৰ প্ৰায় ৩৮ জন ছাত্ৰ-ছাত্ৰী আছে । তাৰে দুজন যুদ্ধৰ আগমুহূৰ্তত যাবলৈ সক্ষম হয় । গতিকে অন্যান্য সকল নিজৰ নিজৰ স্থানত আবদ্ধ হৈ আছে । ভাৰতলৈ আহিবলৈ হ’লে ছুমিৰ পৰা ৰোমানিয়াৰ সীমান্তলৈ পথৰ দূৰত্ব কমেও ১,৩০৭ কিলোমিটাৰ বুলি নীলমে জনায় । গতিকে যি সময়ত মানুহ ঘৰৰ বাহিৰলৈ ওলোৱাটোৱে অসম্ভৱ, তেনে স্থলত ইমানদূৰ বাট অতিক্ৰম কৰাটো অবাস্তৱ কথা । যিসকল ভাৰতলৈ আহিবলৈ সক্ষম হৈছে তেওঁলোকৰ স্থানত যুদ্ধৰ প্ৰভাৱ সিমান পৰা নাই বুলিও নীলমে কয় ।
সীমান্ত পাৰ হওতে তিনি-চাৰিঘণ্টা সময়
ইউক্ৰেইনৰ পৰা আহি কালি ঘৰত উপস্থিত হোৱাৰ শ এজন ছাত্ৰ হ’ল নলবাৰীৰ বৰনৰ্দ্দী গাঁৱৰ দ্বীপেন্দ্ৰ নাৰায়ণ শৰ্মা আৰু চিত্ৰা দেৱীৰ পুত্ৰ অংশুমান শৰ্মা । ছাত্ৰজনে কয় যে যুদ্ধ লগাৰ পাছত এজন বন্ধুৱে তেওঁক ফোন কৰি ৰোমানিয়াৰ যোৱাৰ বাবে ১০ মিনিটৰ ভিতৰতে সাজু হ’বলৈ কৈছিল । তাৰ পাছত এখন টেক্সীৰে তেওঁলোকে যাত্ৰা কৰি নিশা প্ৰায় আঢ়ৈ বজাত ইউক্রেইন-ৰোমানিয়া সীমান্তত উপস্থিত হৈছিল । কিন্তু যথেষ্ট ভিৰ আৰু অন্যান্য কাৰণত তিনি-চাৰি ঘণ্টা পাছতহে ৰোমানিয়াত প্ৰৱেশ কৰিবলৈ সক্ষম হৈছিল ।
অংশুমানে কয়, ‘ৰোমানিয়াত প্ৰৱেশ কৰাৰ পাছত ভাৰত চৰকাৰৰ প্ৰতিনিধিয়ে আমাৰ দায়িত্ব লৈছিল । আমাক খোৱা-লোৱাৰ ব্যৱস্থা কৰা হৈছিল । তাৰ ফলতে আমি ঘৰত উপস্থিত হ’বলৈ সক্ষম হও । ভাৰতীয় আৰু ২৪৯ গৰাকী ছাত্ৰ-ছাত্ৰী শীঘ্ৰে আমাৰ দেশত উপস্থিত হ’ব । তেওঁলোকে ইতিমধ্যে সীমান্ত পাৰ হৈছে ।’
যুদ্ধৰ অভিজ্ঞতা সন্দৰ্ভত তিনি বছৰ পূৰ্বে চিকিৎসা বিজ্ঞানৰ পাঠ্যক্ৰম অধ্যয়ন কৰিবলৈ ইউক্ৰেইনলৈ যোৱা ছাত্ৰজনে জনায় যে ৰাছিয়ান সেনাৰ আক্ৰমণৰ খবৰ আহিলেই সংকেত ধ্বনি বাজি উঠে । লগে লগে তেওঁলোকে ঘৰৰ তলত থকা বাংকাৰলৈ দৌৰ মাৰে । বাংকাৰত খোৱা-বোৱাৰ কোনো ব্যৱস্থা নাই । প্ৰথমতে ইউক্ৰেইনৰ কোনো কোনো স্থানতহে কাৰ্ফিউ আছিল যদিও এতিয়া সকলোতে ঘোষণা কৰা হৈছে ।
লাহৰীঘাট-দেৰগাঁৱৰ ছাত্ৰ আবদ্ধ
ইউক্ৰেইনত আবদ্ধ হৈ থকা এজন ছাত্ৰ হ’ল ছুমি বিশ্ববিদ্যালয়ত চিকিৎসা বিজ্ঞান অধ্যয়ন কৰি থকা মৰিগাঁও জিলাৰ লাহৰীঘাটৰ ভূঞাবাৰী গাঁৱৰ আফজলুৰ ৰহমান । ভিডিঅ’ কলিঙৰ জৰিয়তে ছাত্ৰজনে পিতৃ-মাতৃক অৱগত কৰিছে যে ৰাছিয়ান সেনাৰ আক্ৰমণৰ পৰা ৰক্ষা পাবলৈ তেওঁ বাংকাৰত আশ্ৰয় লৈ আছে ।
ইপিনে, ইউক্ৰেইনৰ পৰা ওলাই ৰোমানিয়াত আশ্ৰয় লৈ আছে দেৰগাঁৱৰ ইন্দ্ৰানী দেৱী হাইস্কুলৰ সমীপৰ বাসিন্দা প্ৰয়াত নিজান তনু বৰপূজাৰী আৰু মিতালী বৰপূজাৰীৰ একমাত্ৰ পুত্ৰ নিশিকেশ কৌশিক । বিগত ২০১৮ত তেওঁ চিকিৎসা বিজ্ঞান অধ্যয়নৰ বাবে দেশখনলৈ গৈছিল । নিশিকেশে ‘দৈনিক অগ্ৰদূত’ক জনোৱা মতে, ৰোমানিয়াত তেওঁ সুৰক্ষিত অৱস্থাত আছে । ছাত্ৰজনৰ মাতৃয়ে তেওঁৰ পুত্ৰৰ লগতে আন ছাত্ৰ-ছাত্ৰীসকলকো ঘৰলৈ ঘূৰাই অনাৰ ব্যৱস্থা কৰিবলৈ কেন্দ্ৰ আৰু ৰাজ্য চৰকাৰক আহ্বান জনায় ।