সদৌ অসম সংখ্যালঘু ছাত্ৰ সন্থা চমুকৈ আমছুৰ সভাপতি ৰেজাউল কৰিম চৰকাৰে আজি চিৰাং জিলা সদৰ কাজলগাঁৱত এনআৰচিৰ ৰিভেৰিফিকেচন সন্দৰ্ভত প্ৰতিক্ৰিয়া প্ৰকাশ কৰি কয় যে অসম চৰকাৰ সম্পূৰ্ণ বিফল হৈছে । মূল্যবৃদ্ধিকে আদি কৰি বিভিন্ন সমস্যাই মূৰ দাঙি উঠাত সেইসমূহ সমাধানত বিফল মুখ্যমন্ত্ৰীজনে মানুহৰ চিন্তাধাৰা অইনফালে ঢাল খুৱাবলৈ এনআৰচিৰ প্ৰসংগ পুনৰ বিতৰ্কৰ মাজত আনিছে ।
এইখন এনআৰচি আমি কৰা নাছিলো । উচ্চতম ন্যায়ালয়ৰ তত্বাৱধানত বিজেপি নেতৃত্বাধীন চৰকাৰখনেই কৰিছিল । গতিকে ইয়াত কিবা মনে সজা সিদ্ধান্ত ল’ব সেয়া আমি মানি নলওঁ আমি উচ্চতম ন্যায়ালয়ৰ কাষ চাপিম বুলিও হুংকাৰ দিয়ে ।
আমছুৰ সভাপতিজনে লগতে আছুৰ সম্পাদক শংকৰজ্যোতি বৰুৱাক উভতি ধৰি কয় আমছু বাংলাদেশীৰ ৰক্ষক নহয় । বাংলাদেশী ওলিয়াই দিয়ক আমি ব্যৱস্থা ল’ম । অসম চুক্তিৰ ৰূপায়ণহে বিচাৰিছো আমি । অসম চুক্তি আমি কৰা নাছিলো আছুয়েহে কৰিছে । এনআৰচি আমি বিচৰা নাছিলো আছুয়েহে বিচাৰিছে । গতিকে অসম চুক্তি অনুসৰি ৭১চনৰ পাছৰ মানুহ বিচাৰিছো আমি ।
এনআৰচি লৈ মিঠাই আমি খোৱা নাছিলো আছুয়েহে খাইছিল । উচ্চতম ন্যায়ালয়ৰ তত্বাৱধানত এনআৰচিৰ কাম তেওঁলোকেহে চোৱাচিতা কৰিছিল আমি কৰা নাছিলো । গতিকে আমছুয়ে কাৰো ৰঙা চকু কেৰেপ নকৰে বুলি সকীয়নি প্ৰদান কৰে ।